काठमाडौं । सुदूरपश्चिम प्रदेशको टीकापुरमा संघीय संसदका दुवै सदन र सातवटै प्रदेश सभाबीच समन्वय, सहकार्य तथा संसदीय अनुभव आदानप्रदानलाई प्रभावकारी बनाउने उद्देश्यले उच्चस्तरीय अन्तर-व्यवस्थापिका सम्मेलन शनिबारदेखि सुरु हुँदैछ।
जेठ २३ र २४ गते सञ्चालन हुने सम्मेलनमा सहभागी हुन प्रतिनिधि सभाका सभामुख डोलप्रसाद (डीपी) अर्याल, राष्ट्रिय सभाका अध्यक्ष नारायणप्रसाद दाहाल, उपसभामुख रूबी कुमारी तथा राष्ट्रिय सभा उपाध्यक्ष लिला कुमारी भण्डारीसहित संघीय संसद र प्रदेश सभाका पदाधिकारी धनगढी पुगिसकेका छन्।
शनिबार बिहान ८ः३० बजे हुने उद्घाटन सत्र सुदूरपश्चिम प्रदेश सभाका सभामुख भीमबहादुर भण्डारीको अध्यक्षतामा सञ्चालन हुनेछ। प्रतिनिधि सभाका सभामुख र राष्ट्रिय सभाका अध्यक्षले संयुक्त रूपमा सम्मेलनको उद्घाटन गर्ने कार्यक्रम रहेको छ। उद्घाटन समारोहमा सुदूरपश्चिम प्रदेशका मुख्यमन्त्री कमलबहादुर शाहसहित प्रमुख अतिथिहरूले शुभकामना मन्तव्य व्यक्त गर्नेछन्।
सम्मेलनअन्तर्गत शनिबार दिउँसो १२ः३० बजेदेखि सुरु हुने बन्द सत्रमा संसदीय प्रणाली, कानुन निर्माण तथा संघीय शासनसँग सम्बन्धित विभिन्न विषयमा कार्यपत्र प्रस्तुत गरिनेछ। संघीय संसद सचिवालयका सचिव डा. रोजनाथ पाण्डे, सूचना प्रविधि विज्ञ विनित सत्याल, संविधानसभा सदस्य खिमलाल देवकोटा तथा पूर्वसचिव डा. सुरेन्द्र अर्यालले क्रमशः लेजिस्लेटिभ एकेडेमी, डिजिटल पार्लियामेन्ट, कानुन निर्माणमा अन्तरतह समन्वय र आदर्श बजेट निर्माण प्रक्रियाबारे प्रस्तुति दिने कार्यक्रम छ।
कार्यपत्र प्रस्तुतिपछि संघीयता कार्यान्वयनको अवस्था, सभा सञ्चालनका असल अभ्यास, अन्तर-व्यवस्थापिका समन्वय तथा आगामी कार्यदिशाबारे सहभागीहरूबीच विस्तृत छलफल हुनेछ। सम्मेलनमा संघीय संसदका दुवै सदन तथा सातै प्रदेश सभाका सभामुख, उपसभामुख, अध्यक्ष, उपाध्यक्ष, प्रमुख सचेतक, समितिका सभापति, सचिव तथा सम्बन्धित पदाधिकारीहरूको सहभागिता रहनेछ।
सम्मेलनको दोस्रो दिन आइतबार संघीय संसदका महासचिव पद्मप्रसाद पाण्डेयले ‘टीकापुर घोषणापत्र’को मस्यौदा प्रस्तुत गर्नेछन्। सहभागीहरूको सुझाव समेटेर घोषणापत्र पारित तथा हस्ताक्षर गरिने कार्यक्रम रहेको छ। सम्मेलन आइतबार बिहान १०ः३० बजे औपचारिक रूपमा समापन हुनेछ भने त्यसका निष्कर्ष र ‘टीकापुर घोषणापत्र’ सार्वजनिक गर्न बिहान ११ बजे पत्रकार सम्मेलन आयोजना गरिनेछ।
