भक्तपुर । राष्ट्रिय स्वतन्त्र पार्टी (रास्वपा) भक्तपुरको जिल्ला अधिवेशन नजिकिँदै जाँदा नेतृत्व चयनलाई लिएर जिल्लाको राजनीतिक माहोल तातिएको छ। आगामी जेठ २३ गते शनिबार सूर्यविनायकस्थित थापा पार्टी प्यालेसमा हुने जिल्ला अधिवेशनमा सभापतिदेखि विभिन्न पदाधिकारी तथा सदस्य पदसम्मका आकांक्षीहरूको संख्या बढ्दै गएपछि अधिवेशन प्रतिस्पर्धात्मक बन्ने संकेत देखिएको छ।
पार्टी स्रोतका अनुसार जिल्ला सभापति पदका लागि केही चर्चित नेताबीच मुख्य प्रतिस्पर्धा हुने सम्भावना छ। उम्मेदवारी दर्ता प्रक्रिया अझै पूरा नभएकाले आधिकारिक उम्मेदवारहरूको अन्तिम सूची सार्वजनिक हुन बाँकी छ। सम्भावित उम्मेदवारहरूले प्रतिनिधि र कार्यकर्तासँग भेटघाट तथा छलफललाई तीव्रता दिएका छन्।
सभापति पदमा वर्तमान जिल्ला सभापति रामेश्वर वस्नेतको नाम प्रमुख रूपमा चर्चामा छ। उनी सर्वसम्मत रूपमा चयन हुन्छन् वा निर्वाचनमा जान्छन् भन्ने विषय भने अधिवेशन नजिकिँदै जाँदा स्पष्ट हुने अपेक्षा गरिएको छ।
उपसभापति पदमा वर्तमान उपसभापति स्मृति भट्टराईको नाम चर्चामा छ। यद्यपि पार्टीभित्र अन्य आकांक्षीहरू पनि सक्रिय रहेको बताइएको छ। सचिव पदमा पार्टीका संस्थापक तथा पूर्व भक्तपुर नगर सभापति राजेश शिल्पकारको नाम चर्चामा रहेको छ। वर्तमान जिल्ला सचिव रुकेश रञ्जित पनि सचिव पदका सम्भावित दाबेदारका रूपमा हेरिएका छन्। पार्टीभित्रको समीकरणअनुसार सचिव पदमा प्रतिस्पर्धा भए शिल्पकार सभापति पदमै दाबेदारी प्रस्तुत गर्न सक्ने चर्चा पनि चलेको छ।
सहसचिव पदमा रामकृष्ण देउजाको नाम अगाडि आएको छ भने वर्तमान सहसचिव कृष्णबहादुर तामाङ पनि पुनः नेतृत्वमा निरन्तरता खोज्ने पक्षमा रहेको बताइन्छ। पार्टी विधानअनुसार कोषाध्यक्ष भने निर्वाचित पदाधिकारीहरूले मनोनयन गर्ने व्यवस्था छ। हाल उक्त जिम्मेवारी प्रह्लाद कार्कीले सम्हालिरहेका छन्।
१५ सदस्यीय जिल्ला समिति गठन हुने :
अधिवेशनबाट १५ सदस्यीय जिल्ला कार्यसमिति चयन हुनेछ। पार्टीको संरचनाअनुसार भक्तपुरका चारवटै नगरपालिकाबाट एक–एक जना प्रतिनिधि रहने व्यवस्था भएकाले अधिवेशनबाट ११ जना पदाधिकारी तथा सदस्य प्रत्यक्ष निर्वाचित हुनेछन्।
पार्टी स्रोतका अनुसार सहमतिमा नेतृत्व चयन हुन नसके सभापतिदेखि प्रमुख पदहरूमा निर्वाचन हुने सम्भावना बलियो छ। त्यसैले यसपटकको अधिवेशनलाई केवल नेतृत्व चयनको प्रक्रिया मात्र नभई पार्टीभित्रको शक्ति परीक्षणका रूपमा पनि हेरिएको छ।
संघीय सांसदलाई संगठनभन्दा संसदीय भूमिकामा केन्द्रित गर्ने पार्टीको सन्देश :
परिपत्रमा पार्टी संगठन तीव्र रूपमा विस्तार भइरहेका कारण दैनिक संगठनात्मक गतिविधि तथा आन्तरिक व्यवस्थापनको जिम्मेवारी मुख्यतः पार्टी संरचनाले नै सम्हाल्ने उल्लेख गरिएको छ। संघीय सांसदहरूलाई भने आफ्नो समय, अनुभव र क्षमताको अधिकतम उपयोग नीति निर्माण, कानुन निर्माण तथा नागरिकका मुद्दा संसद्मार्फत उठाउने कार्यमा केन्द्रित हुन सुझाव दिइएको छ।
पार्टीले सांसदहरूलाई निर्वाचन क्षेत्रका जनतासँग नियमित सम्पर्क कायम राख्दै जनअपेक्षा सम्बोधन गर्न आग्रह गरे पनि पार्टीको केन्द्रीय संरचनामा रहेर रणनीतिक तथा नीतिगत भूमिकामा बढी सक्रिय हुन प्रेरित गरेको छ। यसलाई पार्टीभित्र संगठन र संसदीय भूमिकाबीच जिम्मेवारीको स्पष्ट विभाजन गर्ने प्रयासका रूपमा समेत हेरिएको छ।
भावी दिशा तय गर्ने अधिवेशन :
रास्वपा भक्तपुरका नेता तथा कार्यकर्ताहरूका अनुसार यसपटकको जिल्ला अधिवेशनले जिल्लामा पार्टीको भावी दिशा निर्धारण गर्ने भएकाले चासो बढेको छ। नेतृत्वमा पुग्न चाहने आकांक्षीहरूले संगठन विस्तार, पार्टी सुदृढीकरण, जनसम्पर्क वृद्धि तथा आगामी निर्वाचनको तयारीलाई मुख्य एजेन्डा बनाएका छन्।
कार्यकर्ताहरूले नेतृत्व चयन प्रक्रिया लोकतान्त्रिक, पारदर्शी र निष्पक्ष हुनुपर्ने मागसमेत उठाएका छन्। उम्मेदवारी दर्ता र अन्तिम नामावली सार्वजनिक भएपछि कुन पदमा को–कोबीच प्रत्यक्ष प्रतिस्पर्धा हुने भन्ने स्पष्ट हुनेछ। तर अहिले नै विभिन्न समूह र नेताहरूले समर्थन जुटाउने अभियानलाई तीव्र बनाएका छन्।
अधिवेशनबाट चयन हुने नयाँ नेतृत्वले संगठन विस्तार, जनआधार सुदृढीकरण र आगामी राजनीतिक रणनीति तय गर्ने महत्वपूर्ण जिम्मेवारी पाउने भएकाले कार्यकर्तादेखि समर्थकसम्मको ध्यान अहिले रास्वपा भक्तपुरको जिल्ला अधिवेशनतर्फ केन्द्रित भएको छ।
