भक्तपुर। राष्ट्रिय स्वतन्त्र पार्टी (रास्वपा) भक्तपुर जिल्ला समितिले आफ्नो प्रथम ऐतिहासिक जिल्ला अधिवेशन आयोजना गर्ने भएको छ। जिल्ला संगठनलाई थप सुदृढ, सक्रिय र व्यवस्थित बनाउने उद्देश्यले अधिवेशन सञ्चालन गर्न लागिएको आयोजकले जनाएको छ।
अधिवेशन २०८३ साल जेठ २३ गते शनिबार बिहान ८:०० बजे सुरु हुनेछ। कार्यक्रम थापा पार्टी प्यालेस, सूर्यविनायक–भक्तपुर मा आयोजना गरिने रास्वपा भक्तरले जनाएकाे छ।
राष्ट्रिय स्वतन्त्र पार्टीले देशभर जिल्ला अधिवेशनहरू सञ्चालन गर्दै संगठन विस्तार र सुदृढीकरण अभियानलाई तीव्रता दिएको छ। पार्टीले स्थानीय तहदेखि जिल्ला र प्रदेश तहसम्मका संरचनालाई व्यवस्थित गर्दै आगामी महाधिवेशनको तयारीसमेत अघि बढाइरहेको छ।
रास्वपा भक्तपुरका अनुसार अधिवेशनमा जिल्ला भरिका पार्टी सदस्य, प्रतिनिधि, शुभेच्छुक तथा विभिन्न तहका नेताहरूको सहभागिता रहने अपेक्षा गरिएको छ। अधिवेशनले संगठनको भावी कार्यदिशा तय गर्नुका साथै जिल्ला नेतृत्वलाई अझ प्रभावकारी बनाउने विषयमा छलफल गर्नेछ।
रास्वपाको भक्तपुर जिल्ला समितिले सम्पूर्ण पार्टी सदस्य तथा शुभेच्छुकहरूलाई कार्यक्रममा उपस्थित भई अधिवेशन सफल बनाउन आग्रह गरेको छ।
