काठमाडौं । राप्रपा सांसद ज्ञानेन्द्र शाहीले सरकारको विरोधमा मात्र केन्द्रित नभई राष्ट्रिय हितका महत्वपूर्ण मुद्दामा सबै राजनीतिक शक्ति एकजुट हुनुपर्ने बताएका छन्। उनले देश र जनताको हितसँग जोडिएका विषयमा सरकारलाई आवश्यक सहयोग गर्नुपर्ने धारणा व्यक्त गरेका हुन्।
शाहीले “प्रधानमन्त्री शाहको विरोध गरेर मात्र हुँदैन, सरकारलाई साथ दिऔं” भन्दै राजनीतिक मतभेदभन्दा माथि उठेर राष्ट्रिय आवश्यकतालाई प्राथमिकता दिनुपर्ने बताएका छन्। उनका अनुसार सकारात्मक काममा समर्थन र कमजोरीमा रचनात्मक आलोचना गर्नु नै जिम्मेवार राजनीतिको परिचायक हो।
उनले विशेषगरी देशको जमिन फिर्ता ल्याउने जस्ता राष्ट्रिय महत्वका विषयमा सरकारलाई साथ दिनु आजको आवश्यकता रहेको उल्लेख गरे। यस्ता संवेदनशील विषयमा दलगत स्वार्थभन्दा राष्ट्रिय हितलाई केन्द्रमा राख्नुपर्ने उनको भनाइ छ।
सांसद शाहीले राष्ट्रको सार्वभौमिकता, भूगोल र राष्ट्रिय स्वाभिमानसँग सम्बन्धित मुद्दामा सबै पक्षबीच सहकार्य आवश्यक रहेको बताए। देशका महत्वपूर्ण एजेन्डालाई सफल बनाउन सरकार र राजनीतिक दलहरूबीच साझा प्रयास हुनुपर्नेमा उनले जोड दिएका छन्।
