काठमाडौं। पछिल्ला राजनीतिक घटनाक्रमले भारत नेपालमा स्थिर सरकारसँग सहकार्य गर्न इच्छुक रहेको संकेत देखिएको विश्लेषण भइरहेका बेला नेपालले पनि केवल विवादमा केन्द्रित नभई राष्ट्रहितलाई प्राथमिकतामा राखेर अघि बढ्नुपर्ने धारणा व्यक्त गरिएको छ।
विश्लेषकहरूका अनुसार विश्वका कुनै पनि दुई देशबीच पूर्ण रूपमा समस्या रहित सम्बन्ध हुँदैन। विकसित राष्ट्रहरूले उत्पन्न विवादलाई व्यवस्थापन गर्दै संवादमार्फत समाधान खोज्ने र आफ्नो राष्ट्रिय हित सुनिश्चित गर्ने अभ्यासलाई प्राथमिकता दिएका छन्।
चीन र अमेरिका जस्ता विश्व शक्तिहरूबीच तीव्र प्रतिस्पर्धा, अविश्वास र विभिन्न विषयमा मतभेद रहँदा पनि उनीहरूले व्यापार, लगानी तथा रणनीतिक स्वार्थलाई समानान्तर रूपमा अघि बढाइरहेका छन्। अरबौं डलरको आर्थिक कारोबार कायम राख्न सफल यी देशहरूको अनुभवबाट नेपालले पनि पाठ सिक्नुपर्ने मत व्यक्त गरिएको छ।
यद्यपि नेपालमा राष्ट्रहितभन्दा भावनात्मक राष्ट्रवादका नारा बढी हाबी हुने प्रवृत्ति देखिएको भन्दै चिन्ता व्यक्त गरिएको छ। केही राजनीतिक तथा सामाजिक समूहहरू समाधानभन्दा विवादलाई प्राथमिकता दिने प्रवृत्तिमा रहेको आरोप समेत लगाइएको छ।
वक्ताहरूले देशको विकास केवल चर्का नाराहरूबाट सम्भव नहुने उल्लेख गर्दै रोजगारी सिर्जना, लगानी भित्र्याउने वातावरण निर्माण तथा आर्थिक समृद्धिका लागि व्यावहारिक नीति र कूटनीतिक पहल आवश्यक रहेको बताएका छन्।
उनीहरूको भनाइमा भावनात्मक उत्तेजना, चर्का भाषण वा उखान–टुक्काले मात्र राष्ट्र समृद्ध बन्न नसक्ने भएकाले नेपालले सन्तुलित, व्यावहारिक र राष्ट्रहितमुखी कूटनीति अवलम्बन गर्दै विकास र समृद्धिलाई मुख्य प्राथमिकतामा राख्नुपर्ने आवश्यकता रहेको छ।
