गोरखा। प्रधानमन्त्री बालेन्द्र शाहले संसदमा दिएको राष्ट्रियता तथा नेपालको सीमासम्बन्धी अभिव्यक्तिप्रति आपत्ति जनाउँदै वाईसिएल नेपाल गोरखाले आज जिल्ला प्रशासन कार्यालय गोरखामार्फत ज्ञापनपत्र बुझाएको छ।
वाईसिएल नेपाल केन्द्रीय सदस्य तथा गोरखा इन्चार्ज सागर श्रेष्ठको नेतृत्वमा गएको टोलीले प्रमुख जिल्ला अधिकारीमार्फत प्रधानमन्त्रीलाई सम्बोधन गरिएको ज्ञापनपत्र बुझाएको हो।
ज्ञापनपत्रमा प्रधानमन्त्रीको अभिव्यक्तिले आम नेपालीको राष्ट्रिय भावना र राष्ट्रिय स्वाभिमानमा चोट पुर्याएको उल्लेख गर्दै उक्त अभिव्यक्ति फिर्ता लिन तथा सार्वजनिक रूपमा माफी माग्न माग गरिएको छ।
वाईसिएल नेपालका अनुसार केन्द्रीय समितिको निर्देशनबमोजिम आज देशभरका ७६ जिल्ला प्रशासन कार्यालयमार्फत एकैसाथ ज्ञापनपत्र बुझाइएको हो। यसअघि मंगलबार संगठनले प्रधानमन्त्रीको अभिव्यक्तिको विरोधमा देशव्यापी मशाल जुलुससमेत प्रदर्शन गरेको जनाएको छ।
ज्ञापनपत्र बुझाउने क्रममा वाईसिएल नेपाल गोरखाले प्रधानमन्त्रीले आफ्नो अभिव्यक्तिप्रति स्पष्ट धारणा सार्वजनिक गरी माफी नमागे थप संघर्षका कार्यक्रम घोषणा गरिने चेतावनी दिएको छ। संगठनले आवश्यक परे गोरखा जिल्लाभर चरणबद्ध आन्दोलनका कार्यक्रम सञ्चालन गरी सरकारको ध्यानाकर्षण गराउने जनाएको छ।
वाईसिएल नेपाल गोरखाले राष्ट्रियता, राष्ट्रिय स्वाभिमान र देशको सार्वभौमिकतासँग सम्बन्धित विषयमा कुनै पनि सम्झौता स्वीकार्य नहुने भन्दै आफ्नो आन्दोलन जारी रहने स्पष्ट पारेको छ।
