भक्तपुर । जग्गा कित्ताकाटसम्बन्धी प्रक्रिया सहज गराइदिने आश्वासन दिएर रकम लिएको तर प्रतिबद्धता अनुसार काम नगरिदिएको आरोपमा एक लेखापढी व्यवसायीलाई प्रहरीले नियन्त्रणमा लिएको छ।
प्रहरी स्रोतका अनुसार चाँगुनारायण नगरपालिका निवासी प्रमोद न्यौपानेविरुद्ध जग्गासम्बन्धी कारोबारमा सेवाग्राहीलाई आश्वासन दिएर काम सम्पन्न नगरिदिएको भन्दै उजुरी परेको थियो। सोही उजुरीका आधारमा आवश्यक सोधपुछ तथा अनुसन्धानका लागि उनलाई मंगलबार साँझ भक्तपुरस्थित मालपोत कार्यालय परिसरबाट नियन्त्रणमा लिइएको जनाइएको छ।
न्यौपाने लेखापढी व्यवसायमा संलग्न रहेको र भक्तपुरमा आफ्नै लेखापढी कार्यालय सञ्चालन गर्दै आएका छन्। उनी लेखापढी व्यवसायी संघ भक्तपुरका साधारण सदस्यसमेत रहेको बताइएको छ।
प्रहरीले घटनासम्बन्धी थप अनुसन्धान जारी रहेको जनाएको छ। हालसम्म उनीविरुद्ध लागेको आरोपको सत्यता अनुसन्धानबाट पुष्टि हुन बाँकी रहेकाले कानुनी प्रक्रियाअनुसार आवश्यक छानबिन भइरहेको प्रहरीको भनाइ छ।
यस घटनालाई कुनै राजनीतिक दल वा संगठनसँग नजोडी व्यक्तिगत रूपमा भएको कारोबार र उजुरीका आधारमा अनुसन्धान अघि बढाइएको सम्बन्धित स्रोतले जनाएको छ। आरोपितको राजनीतिक आबद्धताभन्दा पनि उनीमाथि लागेको आरोप र त्यससम्बन्धी तथ्यको अनुसन्धान नै प्राथमिकतामा रहेको प्रहरीको भनाइ छ।
