काठमाडौं/नयाँ दिल्ली । राष्ट्रिय स्वतन्त्र पार्टी (रास्वपा) का सभापति रवि लामिछाने भारत भ्रमणमा रहेका छन्। हिजो भारत पुगेका लामिछानेले आज भारतीय जनता पार्टी (भाजपा) को केन्द्रीय कार्यालयको अवलोकन गर्नुका साथै भाजपाका विभिन्न नेताहरूसँग भेटवार्ता गरेका छन्। भ्रमणका क्रममा नेपाल–भारत सम्बन्धका विविध विषयमा संवाद र सहकार्य विस्तार गर्ने उद्देश्यसहित उनले विभिन्न प्रस्ताव तथा एजेन्डाहरू अघि सारेका छन्।
लामिछानेले नेपाल–भारतबीच लामो समयदेखि समाधान हुन नसकेका सीमा विवादका विषयलाई संवादमार्फत टुंग्याउनुपर्ने आवश्यकता औँल्याएका छन्। उनले दुई देशबीच विश्वास र सहकार्यको वातावरण निर्माण गर्दै विवादित विषयहरूको कूटनीतिक समाधान खोज्नुपर्ने धारणा राखेको बताइएको छ।
भेटवार्तामा नेपालका लागि रणनीतिक महत्त्व बोकेको रक्सौल–काठमाडौं रेलमार्ग परियोजनालाई प्राथमिकताका साथ अगाडि बढाउनुपर्ने विषय पनि उठाइएको छ। उक्त रेलमार्गले नेपाल र भारतबीचको व्यापार, पर्यटन तथा जनस्तरको आवागमनलाई थप सहज बनाउने विश्वास व्यक्त गरिएको छ।
त्यसैगरी, पोखरा र लुम्बिनीबाट भारतका प्रमुख सहरहरूमा सिधा हवाई उडान सञ्चालन गर्ने विषयमा समेत छलफल भएको जनाइएको छ। यसले पर्यटन प्रवर्द्धन र धार्मिक तथा सांस्कृतिक सम्बन्धलाई थप मजबुत बनाउने अपेक्षा गरिएको छ।
लामिछानेले ‘काठमाडौं–बेङ्गलुरु डिजिटल करिडोर’ को अवधारणा अघि सार्दै सूचना प्रविधि, स्टार्टअप, नवप्रवर्तन र डिजिटल अर्थतन्त्रमा नेपाल–भारत सहकार्य विस्तार गर्नुपर्ने धारणा राखेका छन्। उनले नेपालका युवालाई सूचना प्रविधि क्षेत्रमा अवसर सिर्जना गर्न यस्तो सहकार्य प्रभावकारी हुन सक्ने बताएका छन्।
भेटघाटका क्रममा भारतीय शैक्षिक तथा स्वास्थ्य संस्थाहरूको नेपालमा विस्तार गर्ने सम्भावनाबारे पनि छलफल भएको बताइएको छ। यसले नेपाली नागरिकलाई गुणस्तरीय शिक्षा र स्वास्थ्य सेवामा सहज पहुँच दिलाउन सहयोग पुग्ने विश्वास व्यक्त गरिएको छ।
यस्तै, सीमा क्षेत्रमा रासायनिक मल उद्योग स्थापना गर्ने प्रस्ताव, जलविद्युत् तथा ऊर्जा बजारको एकीकरण, र भारतीय प्रिमियर लिग (आईपीएल) लगायतका खेलकुद गतिविधिमा नेपाली खेलाडी तथा रंगशालाको सहभागिता बढाउने विषयहरू पनि एजेन्डामा समेटिएका छन्।
रास्वपाका अनुसार लामिछानेको भारत भ्रमण केवल राजनीतिक भेटघाटमा सीमित नभई आर्थिक, पूर्वाधार, शिक्षा, स्वास्थ्य, ऊर्जा र डिजिटल सहकार्यका सम्भावनाहरूको खोजीमा केन्द्रित रहेको छ। भाजपा नेताहरूसँगको छलफलबाट नेपाल–भारत सम्बन्धलाई नयाँ आयाम दिने विषयमा सकारात्मक संवाद भएको दाबी गरिएको छ।
भारत भ्रमणका क्रममा भएका भेटवार्ता र उठाइएका एजेन्डाहरूले आगामी दिनमा नेपाल–भारत सम्बन्धका विभिन्न क्षेत्रमा नयाँ बहस र सम्भावित सहकार्यको आधार तयार पार्न सक्ने राजनीतिक विश्लेषकहरूको भनाइ छ।
