काठमाडौँ । काठमाडौँ महानगरपालिकाको सहकारी विभागमा बचत रकम फिर्ता गरिदिन माग गर्दै छ हजारभन्दा बढी बचतकर्ताले उजुरी दिएका छन्। उनीहरूले कुल ४ अर्ब ७७ करोड ४९ लाख २३ हजार बराबरको बचत फिर्ता माग गरेका हुन्।
सहकारी विभागका अनुसार गत वैशाख १७ गतेदेखि हालसम्म ६ हजार ३०० भन्दा बढी बचतकर्ताले उजुरी दिएका छन्। विभाग प्रमुख ध्रुवकुमार काफ्लेका अनुसार उजुरी दिने अधिकांश बचतकर्ताले रु १ लाखदेखि रु ५ लाखसम्मको सानो रकम माग गरेका छन्।
उनले दैनिक ५०० देखि १ हजारसम्म नयाँ उजुरी आउने गरेको जानकारी दिँदै साना बचतकर्ताको हिस्सा करिब ७८ प्रतिशत रहेको बताए।
विभागका अनुसार पछिल्ला दिनमा बचत फिर्ता माग गर्नेहरूको संख्या उल्लेख्य रूपमा बढ्दै गएको छ।
यसैबीच काठमाडौँ महानगरपालिका–६ मा सञ्चालित बुद्ध दर्शन सेभिङ एण्ड क्रेडिट को–अपरेटिभ लिमिटेडले केही बचतकर्तालाई रकम फिर्ता गर्न सुरु गरेको छ। सो सहकारीले एक लाख ५० हजारसम्म बचत गर्ने ३४ जनाको रकम हालै फिर्ता गरेको विभागले जनाएको छ।
सहकारीले आगामी एक महिनाभित्र पाँच लाख रुपैयाँसम्म बचत गर्ने बचतकर्ताको रकम फिर्ता गर्ने योजना बनाएको छ।
सहकारी विभागले बचत फिर्ता र ऋण असुली दुवै प्रक्रियामा सहजीकरण गर्दै आएको जनाएको छ। विभागका प्रमुख काफ्लेले उजुरीका आधारमा पहिले सहकारी सञ्चालक र बचतकर्ताबीच छलफल तथा मिलापत्र गराउने प्रयास गरिने बताए।
वडास्तरमा समाधान नभए विभागले थप पहल गर्ने र आवश्यक परेमा कानुनी कारबाहीका लागि सिफारिससमेत गरिने उनले जानकारी दिएका छन्।
