काठमाडौं । पूर्वगृहमन्त्री सुधन गुरुङमाथि उठेका सार्वजनिक सरोकारका विषयमा अध्ययन तथा छानबिन गर्न गठित समितिले आज सरकारलाई प्रतिवेदन बुझाउने तयारी गरेको छ।
समितिले गुरुङसँग बयान लिने, सम्पत्ति विवरण अध्ययन गर्ने लगायतका प्रक्रिया पूरा गरेपछि राय–सुझावसहितको प्रतिवेदन सरकारसमक्ष पेश गर्न लागेको हो।
समितिका सदस्य अच्युतमणि नेउपानेका अनुसार समितिलाई दिइएको कार्यादेशअनुसारको छानबिन कार्य सम्पन्न भइसकेको छ।
‘पूर्वगृहमन्त्री गुरुङसँग बयान लिने, सम्पत्ति विवरणलगायतका विषयमा अध्ययन गर्ने काम पूरा भइसकेको छ,’ उनले भने, ‘आजै सरकारलाई प्रतिवेदन बुझाउने तयारी गरेका छौँ।’
उनका अनुसार प्रतिवेदनमा प्रमाणका आधारमा स्पष्ट निष्कर्ष र सुझाव समावेश गरिएको छ। दोषी वा निर्दोष जे भए पनि तथ्य र प्रमाणका आधारमा राय प्रस्तुत गरिएको समितिको भनाइ छ।
मन्त्रिपरिषद्को वैशाख २८ गतेको बैठकले उच्च अदालतका पूर्वन्यायाधीश अच्युतप्रसाद भण्डारीको अध्यक्षतामा तीन सदस्यीय समिति गठन गरेको थियो। समितिमा महालेखा नियन्त्रक शोभाकान्त पौडेल र सहन्यायाधिवक्ता अच्युतमणि नेउपाने सदस्य रहेका छन्।
समितिलाई प्रतिनिधिसभा सदस्यसमेत रहेका गुरुङसँग सम्बन्धित सार्वजनिक रूपमा उठेका विषयको सत्यतथ्य अध्ययन गरी १५ दिनभित्र प्रतिवेदन बुझाउने जिम्मेवारी दिइएको थियो।
व्यापारी दीपक भट्टसँग व्यापारिक साझेदारी रहेको विषय सार्वजनिक भएपछि गुरुङ विवादमा तानिएका थिए। त्यसपछि उनले वैशाख ९ गते गृहमन्त्री पदबाट राजीनामा दिएका थिए। उनी २६ दिन मात्रै गृहमन्त्रीको जिम्मेवारीमा रहेका थिए।
सम्पत्ति शुद्धीकरण अनुसन्धान विभागको थुनामा रहेका भट्टको लिबर्टी माइक्रो इन्स्योरेन्स र स्टार माइक्रो इन्स्योरेन्सको सेयर खरिद प्रकरणमा गुरुङको नाम जोडिएपछि उनीमाथि राजनीतिक तथा सार्वजनिक दबाब बढेको थियो।
रकमको स्रोतबारे प्रश्न उठेपछि गुरुङले आफूले सापटी लिएर करिब ५० लाख रुपैयाँ बराबरको सेयर खरिद गरेको दाबी गर्दै आएका छन्।
