भक्तपुर । राष्ट्रिय स्वतन्त्र पार्टी (रास्वपा) सूर्यविनायक नगर समिति, भक्तपुरको प्रथम नगर अधिवेशन सम्पन्न भएको छ। सूर्यविनायकस्थित योयो ब्याङ्क्वेटमा आयोजित अधिवेशनमा पार्टीका नेता, कार्यकर्ता, शुभेच्छुक तथा स्थानीय नागरिकहरूको उल्लेखनीय सहभागिता रहेको थियो।
अधिवेशनका प्रमुख अतिथिका रूपमा रास्वपाका महामन्त्री कविन्द्र बुर्लाकोटी सहभागी भएका थिए। कार्यक्रममा रुकेश रञ्जित सहित रास्वपाका जिल्ला, नगर, प्रदेश तथा केन्द्रीय तहका नेताहरूको उपस्थिति रहेको थियो।
अधिवेशनमा पार्टीको संगठन विस्तार, आगामी रणनीति तथा नगरस्तरीय गतिविधिबारे व्यापक छलफल गरिएको थियो। साथै संगठनलाई थप सुदृढ र प्रभावकारी बनाउने विषयमा सहभागीहरूले आफ्ना धारणा राखेका थिए।
नगरको पहिलो अधिवेशनबाट भाईकृष्ण श्रेष्ठको नेतृत्वमा नयाँ नगर समिति चयन गरिएको छ। नवनिर्वाचित नेतृत्वले संगठनलाई जनतामाझ अझ मजबुत बनाउँदै स्थानीय तहमा पार्टीका गतिविधि प्रभावकारी रूपमा सञ्चालन गर्ने प्रतिबद्धता व्यक्त गरेको छ।
कार्यक्रमलाई सम्बोधन गर्दै नेताहरूले सुशासन, जवाफदेहिता र जनअपेक्षाअनुसारको राजनीति निर्माणमा पार्टी प्रतिबद्ध रहेको बताएका थिए। अधिवेशन सफल बनाउन सहयोग पुर्याउने सम्पूर्ण सदस्य, शुभेच्छुक तथा स्थानीय नागरिकप्रति आयोजकले धन्यवाद व्यक्त गरेको छ।
यसैबीच, कार्यक्रममा बोल्दै रास्वपा नेता खत्रीले हाल चर्चामा रहेको राष्ट्रिय मानव अधिकार आयोगको प्रतिवेदनबारे पनि टिप्पणी गरेका थिए। उनले उक्त प्रतिवेदन कुनै विशेष राजनीतिक दलको कार्यालयमा तयार गरिएको समेत उद्याेश गरेका थिए।
