मकवानपुर । राष्ट्रिय स्वतन्त्र पार्टी (रास्वपा) बागमती गाउँपालिका कार्यसमिति मकवानपुरको सभापतिमा सुजन पाख्रीन सर्वसम्मत चयन हुनुभएको छ। शनिबार सम्पन्न पालिका अधिवेशनले पाख्रीनको नेतृत्वमा नयाँ कार्यसमिति चयन गर्दै आगामी कार्यकालका लागि संगठनलाई थप सुदृढ बनाउने प्रतिबद्धता व्यक्त गरेको छ।
पालिकाका संस्थापक सभापतिसमेत रहनुभएका पाख्रीनलाई सर्वसम्मत रूपमा नेतृत्वको जिम्मेवारी प्रदान गरिएको हो। अधिवेशनले उहाँको नेतृत्वमा ११ सदस्यीय पालिका कार्यसमिति गठन गरेको छ। नवगठित समितिको उपसभापतिमा तारा विश्वकर्मा, सचिवमा उद्वप तिमल्सिना, सहसचिवमा माधव घोरासैनी तथा कोषाध्यक्षमा निर्मल तिमल्सिना चयन हुनुभएको छ। त्यस्तै सदस्यहरूमा रविना राई, होमबहादुर आले, लक्षु बोम्जन, मनकुमारी थोकर, आइतेसिं थोकर र शेरबहादुर केसी रहनुभएको छ।
बागमती गाउँपालिका–८ स्थित शान्तिपुरमा आयोजित अधिवेशनमा पार्टीका केन्द्रीय तथा जिल्ला तहका नेताहरूको उल्लेखनीय सहभागिता रहेको थियो। कार्यक्रममा रास्वपाकी केन्द्रीय नेतृ तथा प्रतिनिधिसभा सदस्य तोसिमा कार्की, मकवानपुर–१ बाट निर्वाचित प्रतिनिधिसभा सदस्य प्रकाश गौतम, नेतृ सुनिता राई लगायतले सम्बोधन गर्दै संगठन विस्तार, सुशासन, पारदर्शिता र जनउत्तरदायी राजनीतिमा रास्वपाको प्रतिबद्धता दोहोर्याएका थिए।
