काठमाडौं । नेकपा (एमाले) केन्द्रीय संगठन विभागको प्रथम बैठक विभाग प्रमुख भानुभक्त ढकालको अध्यक्षता तथा महासचिव शंकर पोखरेलको प्रमुख आतिथ्यमा सम्पन्न भएको छ। बैठकले संगठन सुदृढीकरण, पार्टीको वर्तमान अवस्था र आगामी कार्ययोजनासम्बन्धी महत्त्वपूर्ण निर्णयहरू गरेको जनाएको छ।
बैठकमा देशभरका पार्टी संगठनको अवस्था, कार्यसम्पादन तथा संगठन विस्तारका विषयमा समीक्षा गरिएको थियो। साथै पार्टीलाई थप प्रभावकारी, अनुशासित र जनमुखी बनाउने विषयमा व्यापक छलफल भएको बताइएको छ।
बैठकले देशभरका अगुवा कार्यकर्ता तथा नेताहरूको सहभागितामा आगामी जेठ २० र २१ गते काठमाडौंमा राष्ट्रिय कार्यशाला आयोजना गर्ने निर्णय गरेको छ। उक्त कार्यशालामा पार्टी संगठनसँग सम्बन्धित विविध विषयमा गहन समीक्षा र छलफल गरिने जनाइएको छ।
महासचिव शंकर पोखरेलले कार्यशालालाई संगठनात्मक सुदृढीकरणको महत्त्वपूर्ण अवसरका रूपमा उपयोग गर्नुपर्नेमा जोड दिएका थिए। उनले पार्टीभित्र देखिएका चुनौतीहरूको पहिचान गर्दै समाधानका लागि साझा दृष्टिकोण निर्माण गर्न आवश्यक रहेको बताएका थिए।
संगठन विभाग प्रमुख भानुभक्त ढकालले कार्यशालामा एमालेले सामना गरिरहेका प्रमुख संगठनात्मक समस्याहरूको बारेमा दुई दिनसम्म गम्भीर र केन्द्रित छलफल हुने जानकारी दिए। कार्यशालाबाट प्राप्त सुझाव र निष्कर्षलाई आगामी संगठनात्मक अभियान तथा पार्टी सुदृढीकरणका आधारका रूपमा उपयोग गरिने विश्वास व्यक्त गरिएको छ।
