भक्तपुर । भक्तपुर निर्वाचन क्षेत्र नं. २ बाट निर्वाचित प्रतिनिधिसभा सदस्य तथा रास्वपा नेता राजिब खत्रीले निर्वाचनका क्रममा जनतामाझ गरेका प्रतिबद्धताहरू स्मरण गर्दै अहिलेकाे सरकार जनताको चुलो चिन्ने खालको भएकाे बताएका छन्। सरकारले प्रस्तुत गरेको बजेट जनताको दैनिक जीवन र आवश्यकतालाई केन्द्रमा राखेर ल्याइएको समेत खत्रीले दाबी गरेका छन्।
सूर्यविनायकस्थित एक पार्टी प्यालेसमा आयोजित राष्ट्रिय स्वतन्त्र पार्टीको सूर्यविनायक नगर अधिवेशनलाई सम्बोधन गर्दै सांसद खत्रीले सरकारले ल्याएको बजेट जनताको वास्तविक आवश्यकता सम्बोधन गर्ने उद्देश्यसहित ल्याइएकाे बताए। उनले बजेटले आम नागरिकको जीवनस्तर सुधार र आर्थिक गतिविधि चलायमान बनाउन महत्वपूर्ण भूमिका खेल्ने विश्वास व्यक्त गरे।
उनले विगतमा बजेट निर्माण गर्दा दलगत स्वार्थ वा निश्चित क्षेत्रलाई प्राथमिकता दिने प्रवृत्ति देखिने गरेको उल्लेख गर्दै यसपटकको बजेट त्यसबाट अलग रहेको बताए। खत्रीका अनुसार बजेट कुनै पार्टी, समूह वा क्षेत्र विशेषलाई लक्षित नगरी सम्पूर्ण नेपाली जनताको हितलाई ध्यानमा राखेर ल्याइएको हो।
सांसद खत्रीले सरकारले ल्याएको बजेट देशभरका नागरिकको चुलोसम्म पुग्ने गरी समावेशी र जनमुखी रहेको दाबी गरे। उनले विकास, रोजगारी, उत्पादन वृद्धि तथा नागरिकको जीवनयापन सहज बनाउने कार्यक्रमहरू बजेटमा समेटिएको उल्लेख गर्दै यसको प्रभावकारिता कार्यान्वयनबाट पुष्टि हुने बताए। साथै उनले जनताको अपेक्षा अनुरूप काम गर्न सरकार प्रतिबद्ध रहेको धारणा व्यक्त गरे।
