कृष्ण कुँवर (कर्नेलियस) गण्डकी प्रदेश महिला यू–१९ छनोट प्रतियोगिता अन्तर्गत पर्वत र नवलपुरबीच सम्पन्न खेलमा पर्वतकी खेलाडी जेनिशा शर्मा प्लेयर अफ द म्याच बन्न सफल भएकी छन्।
पर्वत जिल्ला, फलेवास नगरपालिका–२, मेहलपोखरी निवासी जेनिशाले उत्कृष्ट बलिङ प्रदर्शन गर्दै ४ ओभरमा २ मेडन राखी केवल ९ रन खर्चेर महत्वपूर्ण ५ विकेट लिन सफल भइन्। उनको सशक्त प्रदर्शनले खेलमा पर्वत टोलीलाई महत्वपूर्ण बल प्रदान गरेको थियो।
जितपछि प्रतिक्रिया दिँदै जेनिशाले आफ्नो टोलीलाई जिताउन हरसम्भव प्रयास गरिरहने बताईन्। “टिमलाई जिताउन सकिएन भने अझै मेहनत गरेर अगाडि बढ्नेछु,” उनले भनिन्। आफू नेपाली क्रिकेटका चर्चित खेलाडी सन्दीप लामिछानेबाट प्रभावित भएर क्रिकेट क्षेत्रमा प्रवेश गरेको समेत बताईन ।
सानै उमेरमा देखाएको प्रतिभा, मेहनत र अनुशासनले जेनिशा शर्माले नेपाली महिला क्रिकेटको भविष्यप्रति ठूलो आशा जगाएकी छन्। उनको यस उपलब्धिप्रति स्थानीयवासी तथा खेलप्रेमीहरूले बधाई व्यक्त गर्दै उज्ज्वल खेल जीवनको शुभकामना दिएका छन्।
