काठमाडौं । राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछाने भारत प्रस्थान गर्नुअघि प्रधानमन्त्री बालेन शाहसँग विशेष भेटवार्ता भएको स्रोतले जनाएको छ । राजधानीस्थित एक निजी स्थानमा भएको उक्त भेटमा नेपाल–भारत सम्बन्ध, सीमासम्बन्धी विषय, आर्थिक सहकार्य तथा समसामयिक राजनीतिक अवस्थाबारे गम्भीर छलफल भएको बताइएको छ ।
भेटमा विशेषगरी नेपाली भूमि फिर्ता, सीमा विवाद समाधान र नेपालले भारतसँग राख्नुपर्ने नयाँ कूटनीतिक एजेन्डाबारे कुराकानी भएको स्रोतको दाबी छ । छलफलका क्रममा भारतका प्रधानमन्त्री नरेन्द्र माेदी समक्ष राख्न सकिने केही नयाँ प्रस्तावबारे समेत विचार आदानप्रदान भएको बताइएको छ । नेपाल–भारत सम्बन्धलाई केवल राजनीतिक तहमा सीमित नराखी आर्थिक, पूर्वाधार र प्रविधि साझेदारीतर्फ लैजानुपर्ने धारणा दुवै नेताले राखेको जनाइएको छ ।
भेटपछि दुवै पक्षले औपचारिक प्रतिक्रिया भने सार्वजनिक गरेका छैनन् । तर पछिल्लो समय संघीय सरकार, महानगर र वैकल्पिक राजनीतिक शक्तिबीच बढ्दो समन्वयको संकेतका रूपमा यस भेटलाई हेरिएको छ । सामाजिक सञ्जालमा समेत रवि लामिछाने र बालेन शाहबीचको भेटलाई लिएर विभिन्न अड्कलबाजी सुरु भएको छ ।
राजनीतिक विश्लेषकहरूले भने आगामी दिनमा वैकल्पिक शक्ति र स्वतन्त्र नेतृत्वबीच सहकार्यको सम्भावना बढिरहेको संकेतका रूपमा यस घटनालाई व्याख्या गरेका छन् । भारत भ्रमणअघि भएको यो भेटले आगामी राजनीतिक समीकरण, नेपाल–भारत सम्बन्ध र राष्ट्रिय मुद्दामा नयाँ बहस सिर्जना गर्ने अनुमान गरिएको छ ।
