काठमाडौं । सोमबार बसेको मन्त्रिपरिषद् बैठकले चार महत्वपूर्ण निर्णय सार्वजनिक गरेको छ। शिक्षामन्त्री तथा सरकारका प्रवक्ता सस्मित पोखरेलले बैठकका निर्णय सार्वजनिक गर्दै कृषि, ऊर्जा, सहकारी तथा नागरिक उड्डयन क्षेत्रसँग सम्बन्धित विषयमा सरकारको निर्णय सार्वजनिक गरेका हुन्।
बैठकले आगामी आर्थिक वर्ष २०८३/८४ का लागि वर्षे धानबालीको न्यूनतम समर्थन मूल्य निर्धारण गरेको छ। सरकारका अनुसार मोटा धानको प्रतिक्विन्टल मूल्य रु. ३ हजार ६ सय ६० तथा मध्यम धानको प्रतिक्विन्टल मूल्य रु. ३ हजार ८ सय ६० कायम गरिएको छ।
त्यस्तै, संस्कृति, पर्यटन तथा नागरिक उड्डयन मन्त्रालयको सिफारिसमा नेपाल नागरिक उड्डयन प्राधिकरणको महानिर्देशक पदमा सहसचिव मुकेश डंगोललाई नियुक्त गर्ने निर्णय गरिएको छ।
मन्त्रिपरिषद्ले भूमि व्यवस्था, सहकारी तथा गरिबी निवारण मन्त्रालय र संघीय मामिला तथा सामान्य प्रशासन मन्त्रालयअन्तर्गत गठन गरिएको सहकारीमा देखिएको बेथिति जाँचबुझ आयोग, २०८२ को प्रतिवेदन सार्वजनिक गर्ने निर्णय पनि गरेको छ।
यस्तै, अर्थ मन्त्रालयको प्रस्तावअनुसार नेपाल–चीन जोड्ने चिलिमे–केरुङ विद्युत् प्रसारणलाइन आयोजनाको कार्यान्वयनका लागि चीन सरकारलाई पठाइने ‘लेटर अफ रिप्लाइ’ स्वीकृत गरिएको सरकारका प्रवक्ताले जानकारी दिए।
