मकवानपुर। मकवानपुर जिल्लाको मनहरी गाउँपालिका मा राष्ट्रिय स्वतन्त्र पार्टीको प्रथम पालिका अधिवेशन उत्साहपूर्ण वातावरणमा सम्पन्न भएको छ। अधिवेशनबाट गोविन्द सापकोटा पुनः सर्वसम्मत रूपमा पालिका सभापतिमा चयन भएका छन्। पार्टीका स्थानीय नेता–कार्यकर्ता, वडा प्रतिनिधि तथा शुभेच्छुकहरूको उल्लेखनीय सहभागिताबीच सम्पन्न अधिवेशनले आगामी संगठनात्मक यात्राका लागि नयाँ ऊर्जा थपेको बताइएको छ।
स्थानीय तहमा संगठन विस्तार, जनसरोकारका विषयमा सक्रिय भूमिका तथा कार्यकर्तामाझ स्थापित विश्वासका कारण सापकोटालाई पुनः नेतृत्वमा निरन्तरता दिइएको हो। प्रारम्भिक चरणमा उनले नयाँ पुस्तालाई नेतृत्व हस्तान्तरण गर्नुपर्ने धारणा राख्दै जिम्मेवारी नलिने संकेत गरेका थिए। तर वडा सभापतिहरू, प्रतिनिधिहरू तथा स्थानीय कार्यकर्ताहरूको व्यापक आग्रहपछि उनले पुनः नेतृत्व सम्हाल्ने निर्णय गरेका हुन्।
अधिवेशनबाट उपसभापति, सचिव, सहसचिव, कोषाध्यक्ष लगायत अन्य पदाधिकारीहरू पनि सर्वसम्मत रूपमा चयन भएका छन्। नवगठित कार्यसमितिले गाउँपालिकाका सबै वडामा संगठन सुदृढीकरण, जनसहभागिता अभिवृद्धि तथा पार्टीका नीति र कार्यक्रमलाई प्रभावकारी रूपमा कार्यान्वयन गर्ने लक्ष्य लिएको जनाएको छ। कार्यक्रममा बोल्ने अधिकांश प्रतिनिधिहरूले वैकल्पिक राजनीतिक शक्तिको रूपमा राष्ट्रिय स्वतन्त्र पार्टीप्रति जनविश्वास बढ्दै गएको उल्लेख गर्दै संगठनलाई अझ अनुशासित, सक्रिय र जनमुखी बनाउनुपर्नेमा जोड दिएका थिए।
नवनिर्वाचित सभापति गोविन्द सापकोटाले आफूलाई पुनः विश्वास गरेर जिम्मेवारी दिएकोमा सम्पूर्ण कार्यकर्ता तथा प्रतिनिधिहरूप्रति आभार व्यक्त गर्दै आगामी दिनमा जनताको अपेक्षा अनुरूप काम गर्ने प्रतिबद्धता जनाए। उनले गाउँपालिकाका स्थानीय समस्या समाधान, युवाको सहभागिता वृद्धि, सुशासन र पारदर्शितालाई प्राथमिकतामा राखेर अघि बढ्ने बताए। साथै उनले पार्टीको नीति, सिद्धान्त र जनभावनाअनुसार संगठनलाई अझ मजबुत र प्रभावकारी बनाउँदै लैजाने प्रतिबद्धता समेत व्यक्त गरेका छन्।
