काठमाडौं । राष्ट्रिय स्वतन्त्र पार्टी चन्द्रागिरि नगर समितिको पहिलो अधिवेशन सम्पन्न भएको छ। संगठन विस्तार तथा स्थानीय तहमा पार्टीलाई थप सशक्त बनाउने उद्देश्यसहित आयोजित अधिवेशनले नयाँ नेतृत्व चयन गरेको हो।
अधिवेशनअन्तर्गत सम्पन्न निर्वाचनबाट जनार्दन केसी चन्द्रागिरि नगर सभापतिमा निर्वाचित भएका छन्। सभापति पदका लागि खसेको कुल २०२ मतमध्ये केसीले १५३ मत प्राप्त गर्दै स्पष्ट बहुमतसहित विजय हासिल गरेका हुन्। उनका प्रतिस्पर्धी मधुकर बस्नेतले ४९ मत प्राप्त गरेका थिए। निर्वाचन प्रक्रिया उत्साहपूर्ण र सौहार्द वातावरणमा सम्पन्न भएको बताइएको छ।
यस्तै, उपसभापति पदमा करुणा श्रेष्ठ निर्विरोध निर्वाचित भएकी छन् भने सचिव पदमा मन्दीरा थापा झिनो मतान्तरले विजयी भएकी छन्। अधिवेशनबाट एक उपसचिव र नौ सदस्यसहित १३ सदस्यीय नयाँ नगर कमिटी चयन गरिएको छ।
अधिवेशनमा प्रमुख अतिथिका रूपमा प्रतिनिधि सभा सदस्य भूमिका श्रेष्ठ को उपस्थिति रहेको थियो। कार्यक्रममा काठमाडौं निर्वाचन क्षेत्र नम्बर १० बाट निर्वाचित सांसद प्रदिप बिष्ट लगायत पार्टीका नेता तथा कार्यकर्ताको समेत उल्लेखनीय सहभागिता रहेको थियो।
कार्यक्रमलाई सम्बोधन गर्दै प्रमुख अतिथि श्रेष्ठले अल्पसंख्यक समुदायलाई प्रतिनिधि सभासम्म पुर्याउने साहस गरेको भन्दै पार्टी सभापति रवि लामिछाने लाई धन्यवाद व्यक्त गरिन्। उनले अब संसदबाट पनि अल्पसंख्यक समुदायको आवाज सशक्त रूपमा उठान हुने बताइन्।
त्यस्तै, सांसद बिष्टले आफू काठमाडौं क्षेत्र नम्बर १० का जनताको पक्षमा काम गर्न निर्वाचित भएको उल्लेख गर्दै चन्द्रागिरि नगरमा पनि आगामी स्थानीय निर्वाचनबाट राष्ट्रिय स्वतन्त्र पार्टीकै नेतृत्व स्थापित हुने दाबी गरे। उनले आगामी निर्वाचनमा रास्वपाले मेयरसहित स्थानीय तहमा उल्लेखनीय सफलता हासिल गर्ने विश्वास व्यक्त गरे।
नवनिर्वाचित पदाधिकारीहरूले चन्द्रागिरि नगरमा पार्टीलाई जनताको भरोसायोग्य राजनीतिक शक्तिका रूपमा स्थापित गर्दै संगठन सुदृढीकरण, जनसरोकारका विषय उठान तथा सक्रिय राजनीतिक अभियान सञ्चालन गर्ने प्रतिबद्धता व्यक्त गरेका छन्।
