काठमाडौं । राष्ट्रिय स्वतन्त्र पार्टी ले आफ्नो पहिलो ऐतिहासिक राष्ट्रिय महाधिवेशनको तयारीलाई तीव्रता दिएको छ। पार्टीको केन्द्रीय निर्वाचन आयोगले २०८३ साल फागुन ७ गते जारी सूचनामार्फत महाधिवेशन तयारी सम्बन्धी विस्तृत कार्यतालिका सार्वजनिक गरेको हो।
सूचनाअनुसार केन्द्रीय निर्वाचन आयोगको निर्णय बमोजिम प्रदेश तथा जिल्ला तहमा निर्वाचन समिति गठन, अधिवेशन प्रतिवेदन संकलन, प्रतिनिधिको नामावली पेश तथा प्रदेश अधिवेशनबाट निर्वाचित पदाधिकारीको विवरण पेशलगायतका काम निश्चित समयसीमाभित्र सम्पन्न गरिनेछ।
कार्यतालिकाअनुसार ७७ जिल्ला तथा ७ प्रदेशमा निर्वाचन समिति गठनको काम फागुन ७ गतेदेखि सुरु भई फागुन १५ गतेसम्म सम्पन्न गरिनेछ। यस्तै, आधिकारिक परिपत्र तथा माइन्युट प्रतिलिपि पठाउने कार्य फागुन १० गतेसम्म सकिने जनाइएको छ।
स्थानीय तथा जिल्ला अधिवेशनको प्रतिवेदन संकलन, जिल्ला अधिवेशन तथा निर्वाचन प्रतिवेदन पेश गर्ने, साथै महाधिवेशन प्रतिनिधिको नामावली पेश गर्ने कार्य पनि फागुन महिनाभित्र सम्पन्न गरिनेछ। प्रदेश अधिवेशनबाट निर्वाचित पदाधिकारीको विवरण चैत ५ गतेसम्म पेश गर्नुपर्ने कार्यतालिकामा उल्लेख छ।
यसैगरी, इलेक्ट्रोनिक भोटिङ मेसिन (EVM) सम्बन्धी छलफल कार्यक्रम पनि चैत ५ गतेसम्म सञ्चालन गरिने जानकारी दिइएको छ।
केन्द्रीय निर्वाचन आयोगले प्रदेश समितिका सभापतिहरूलाई जिल्ला समितिसँग आवश्यक समन्वय गरी निर्धारित कार्यतालिकाअनुसार तयारीलाई प्रभावकारी रूपमा अघि बढाउन आग्रह गरेको छ। सूचनामा उपप्रमुख राम गुरुङको हस्ताक्षर रहेको छ।
