सुनसरी । राष्ट्रिय स्वतन्त्र पार्टी अहिले देशभर ऐतिहासिक अधिवेशनको माहोलमा व्यस्त बनेको छ। पार्टीले संगठन विस्तार तथा स्थानीय संरचना सुदृढीकरणलाई प्राथमिकतामा राख्दै विभिन्न पालिका र वडास्तरमा अधिवेशनलाई तीव्रता दिएको जनाएको छ। विशेषगरी कोशी प्रदेशका जिल्लाहरूमा अधिवेशन गतिविधि उत्साहजनक रूपमा अघि बढिरहेका छन्।
यसैबीच सुनसरीको दुहबी नगरपालिकामा राष्ट्रिय स्वतन्त्र पार्टीको प्रथम ऐतिहासिक नगर अधिवेशन सम्पन्न भएको छ। अधिवेशनबाट मित्र प्रसाद निरौला सर्वसम्मत रूपमा नगर सभापतिमा निर्वाचित भएका छन्। साथै विभिन्न पदाधिकारी तथा सदस्यहरू समेत सर्वसम्मत चयन भएको श्राेतले जनाएको छ।
नवनिर्वाचित नगर सभापति निरौला लगायत सम्पूर्ण पालिका कार्यसमितिलाई पार्टीका नेता तथा कार्यकर्ताले हार्दिक बधाई तथा सफल कार्यकालको शुभकामना व्यक्त गरेका छन्। अधिवेशनले स्थानीय स्तरमा पार्टी संगठनलाई थप मजबुत बनाउने विश्वास व्यक्त गरिएको छ।
पार्टीका अनुसार कोशी प्रदेशका १४ वटै जिल्लाका विभिन्न पालिका र वडाहरूमा अधिवेशन कार्यक्रम निरन्तर सञ्चालन भइरहेका छन्। अधिवेशनमार्फत नयाँ नेतृत्व चयन, संगठन विस्तार तथा आगामी राजनीतिक रणनीतिबारे छलफल भइरहेको बताइएको छ।
राष्ट्रिय स्वतन्त्र पार्टीले जनतासँग प्रत्यक्ष सम्बन्ध मजबुत बनाउँदै वैकल्पिक राजनीतिक शक्तिको रूपमा आफूलाई स्थापित गर्ने उद्देश्यसहित देशव्यापी रूपमा संगठन निर्माण अभियानलाई तीव्र बनाएको जनाएको छ। पार्टीभित्र देखिएको उत्साह र कार्यकर्ताको सक्रियताले आगामी दिनमा संगठन थप सशक्त बन्ने अपेक्षा गरिएको छ।
