बारा। राष्ट्रिय स्वतन्त्र पार्टी मधेश प्रदेशले बारा जिल्लामा सम्पन्न पार्टी कार्यक्रममा सांसद ‘लखेटिएको’ भन्ने आशयका समाचारहरू भ्रामक, अतिरञ्जित तथा तथ्यहीन रहेको जनाएको छ।
मधेश प्रदेशका महामन्त्री मनिष कुमार साहद्वारा जारी ध्यानाकर्षण वक्तव्यमा सामाजिक सञ्जाल तथा विभिन्न माध्यममार्फत कार्यक्रमसम्बन्धी गलत सूचना फैलाइएकोप्रति गम्भीर ध्यानाकर्षण भएको उल्लेख गरिएको छ।
वक्तव्यअनुसार कार्यक्रमको अन्त्यतिर केही भिड हलभित्र प्रवेश गरेको र अत्यधिक भीडका कारण माननीय सांसद तथा नेतागण बाहिरिने क्रममा खिचिएको भिडियोलाई तोडमोड गरी प्रचार गरिएको दाबी गरिएको छ। पार्टीभित्र फरक मत अभिव्यक्तिलाई समेत जोडेर पार्टीलाई बदनाम गर्ने नियतले समाचार सम्प्रेषण गरिएको आरोप रास्वपाले लगाएको छ।
रास्वपाले अपुष्ट तथा भ्रामक समाचारले राजनीतिक संस्कार, सामाजिक सद्भाव र जनविश्वासमा नकारात्मक असर पार्ने भएकाले सत्यतथ्य बुझेर मात्र समाचार सम्प्रेषण गर्न सञ्चारमाध्यम, सामाजिक सञ्जाल प्रयोगकर्ता तथा सरोकारवालासँग अनुरोध गरेको छ।
साथै, पार्टी सधैं पारदर्शिता, सत्य सूचना तथा लोकतान्त्रिक मूल्य–मान्यताप्रति प्रतिबद्ध रहेको पनि वक्तव्यमा उल्लेख गरिएको छ।
