काठमाडौं । राष्ट्रिय स्वतन्त्र पार्टी अन्तर्गत चन्द्रागिरी नगरपालिकाको प्रथम नगर अधिवेशन भोलि आइतबार आयोजना हुने भएको छ। अधिवेशन चन्द्रागिरी पार्टी प्यालेस, सतुङ्गलस्थित फ्रुटी कारखाना नजिक बिहान ७ बजेदेखि सुरु हुने आयोजकले जनाएको छ।
अधिवेशनलाई सफल बनाउन निर्वाचन समितिले उम्मेदवारी दर्ता प्रक्रिया पनि सार्वजनिक गरेको छ। समितिका अनुसार उम्मेदवारी दर्ता भोलि बिहान ८ बजेदेखि खुला गरिनेछ। उम्मेदवारहरूले पदअनुसार तोकिएको शुल्क बुझाएर निर्वाचन प्रक्रियामा सहभागी हुनुपर्ने व्यवस्था गरिएको छ।
निर्वाचन समितिका अनुसार सभापति पदका लागि १० हजार रुपैयाँ, उपसभापति पदका लागि ५ हजार रुपैयाँ, सचिव पदका लागि ३ हजार रुपैयाँ, अन्य सदस्य पदका लागि १ हजार रुपैयाँ तथा प्रतिनिधिका लागि १ सय रुपैयाँ शुल्क निर्धारण गरिएको छ।
अधिवेशनको तयारी सम्बन्धी छलफल कार्यक्रममा वडा सभापतिहरू, वडा कमिटीका पदाधिकारी तथा विभिन्न प्रतिनिधिहरूको उपस्थिति रहेको थियो। आयोजक समितिले नगर अधिवेशनलाई भव्य तथा व्यवस्थित रूपमा सम्पन्न गर्ने तयारी पूरा भएको जनाएको छ।
