काठमाडौँ । विक्रम तिमल्सिनाले आधुनिक प्रविधिको तीव्र विकासका बीच पनि सामुदायिक रेडियोको महत्त्व र प्रभाव कुनै पनि रूपमा कम नभएको बताउनुभएको छ।
दक्षिण एसियाकै पहिलो सामुदायिक प्रसारण सेवा रेडियो सगरमाथाको ३०औँ स्थापना दिवसका अवसरमा आयोजित विशेष कार्यक्रममा बोल्दै मन्त्री तिमल्सिनाले सञ्चारमाध्यमहरू समयअनुकूल प्रविधिमैत्री बन्दै नागरिकको भावना र जनअपेक्षाअनुसार सञ्चालन हुनुपर्नेमा जोड दिनुभयो।
“सचेत नागरिक, सशक्त समाज : मिथ्या सूचनाविरुद्ध सामुदायिक सञ्चारको अभियान” भन्ने मूल नारासहित सम्पन्न कार्यक्रममा उहाँले जिम्मेवार, नैतिक र उत्तरदायी पत्रकारिता आजको आवश्यकता भएको उल्लेख गर्नुभयो। गलत सूचना र भ्रमपूर्ण सामग्रीको बढ्दो प्रभावलाई रोक्न सामुदायिक सञ्चारमाध्यमहरूले अझ प्रभावकारी भूमिका खेल्नुपर्ने उहाँको भनाइ थियो।
मन्त्री तिमल्सिनाले आफू पनि विगतमा लामो समय रेडियो सगरमाथासँग आबद्ध भएर काम गरेको स्मरण गर्दै उक्त रेडियोलाई नेपालको स्वतन्त्र र निष्पक्ष पत्रकारिताको सशक्त उदाहरणका रूपमा व्याख्या गर्नुभयो। सञ्चारमाध्यमहरूको दिगोपन र सुदृढीकरणका लागि सरकारले आवश्यक सहयोग र सकारात्मक पहल गर्ने प्रतिबद्धता समेत उहाँले व्यक्त गर्नुभयो।
नेपाल वातावरण पत्रकार समूहद्वारा सञ्चालित रेडियो सगरमाथा वि.सं. २०५४ साल जेठ ९ गते स्थापना भएको थियो। स्थापना दिवस समारोहमा सञ्चार क्षेत्रका विशिष्ट व्यक्तित्व, नागरिक समाजका प्रतिनिधि तथा सञ्चारकर्मीहरूको उल्लेखनीय उपस्थिति रहेको थियो।
