मध्यपुर थिमि । राष्ट्रिय स्वतन्त्र पार्टी (रास्वपा) मध्यपुर थिमि नगर समितिको पहिलो नगर अधिवेशन शनिबार सम्पन्न भएको छ । अधिवेशनले नयाँ नेतृत्व चयन गर्नुका साथै संगठन विस्तार र आगामी राजनीतिक कार्यक्रमबारे छलफल गरेको जनाएको छ ।
अधिवेशनमा प्रतिनिधि सभा सदस्य सांसद् रुकेश रञ्जितले प्रधानमन्त्रीको व्यस्तताका कारण संसदमा प्रधानमन्त्रीको फोटो मात्रै टाँसेर पनि संसद चलाउनुपर्ने अवस्था आउन सक्ने बताए । उद्घाटन समारोहलाई सम्बोधन गर्दै उनले संसदमा प्रधानमन्त्री उपस्थित भए वा नभएको विषयलाई लिएर अनावश्यक विवाद गर्नुको अर्थ नरहेको बताए ।
“बहस र छलफल सरकारको नीति तथा कार्यक्रममा हुनुपर्छ, प्रधानमन्त्री आए वा आएनन् भन्ने विषयमा होइन,” उनले भने । विपक्षी दलहरूले सरकारको काममा खोट भेट्टाउन नसकेपछि प्रधानमन्त्रीको उपस्थितिलाई मुद्दा बनाएको आरोप समेत उनले लगाए । प्रधानमन्त्री अहिले काममा अत्यन्त व्यस्त रहेको उल्लेख गर्दै उनले विपक्षीहरूले विरोधका लागि मात्रै विरोध गरिरहेको टिप्पणी गरे ।
कार्यक्रममा प्रमुख अतिथिका रूपमा सांसद् रञ्जु दर्शना सहभागी रहेकी थिइन् । नगर सभापति न्हुछें मानन्धरको सभापतित्वमा सम्पन्न कार्यक्रममा जिल्ला तथा प्रदेश तहका नेताहरू, कार्यकर्ता र शुभेच्छुकहरूको उल्लेख्य उपस्थिति रहेको थियो ।
अधिवेशनबाट नगर ११ सदस्यीय समितिको नयाँ कार्यसमिति समेत चयन गरिएको छ । समितिको नगर सभापतिमा न्हुच्छे रत्न मानन्धर चयन भएका छन् भने उपसभापतिमा उषा प्रजापति निर्वाचित भएकी छन् ।
त्यस्तै जिल्ला प्रतिनिधिमा सुस्मिता श्रेष्ठ, सञ्जय कोइराला र सुरज श्रेष्ठ चयन भएका छन् भने प्रदेश प्रतिनिधिमा राजेश उप्रेति र राधाकृष्ण श्रेष्ठ चयन भएका छन् । महाधिवेशन प्रतिनिधिमा उज्वल श्रेष्ठ र हेमन्त राज बराल चयन भएका छन् ।
रास्वपाले भक्तपुर जिल्लामा संगठन विस्तारलाई तीव्रता दिँदै जाँदा हालसम्म चाँगुनारायण नगर सम्मेलन सम्पन्न भइसकेको र दोस्रो रूपमा मध्यपुर थिमि नगर सम्मेलन सम्पन्न भएको हो । आगामी तेस्रो सम्मेलन सूर्यविनायक नगरपालिकामा गर्ने मिति समेत तय भइसकेको रास्वपा जिल्ला सभापतिले जनाएको छ ।
