मोरङ। श्रम संस्कृती पार्टी मोरङ क्षेत्र नं. ३ द्वारा आयोजित परिचयात्मक तथा भेटघाट कार्यक्रम भव्य रूपमा सम्पन्न भएको छ। पार्टीका १ नम्बर प्रदेश अध्यक्ष प्रताप राई को प्रमुख आतिथ्यता तथा क्षेत्रीय सभापति शिव राई को अध्यक्षतामा कार्यक्रम सम्पन्न भएको हो।
कार्यक्रमलाई सम्बोधन गर्दै प्रमुख अतिथि प्रताप राईले श्रम संस्कृती पार्टीलाई विधानसम्मत, बलियो र प्रभावकारी संगठनका रूपमा अगाडि बढाउन आवश्यक रहेको बताउनुभयो। उहाँले “हर्कवाद” को विचारलाई गाउँ–टोलदेखि प्रत्येक नागरिकसम्म पुर्याउनुपर्नेमा जोड दिँदै पार्टी सदस्यता विस्तार अभियानलाई तीव्र बनाउन आग्रह गर्नुभयो।
उहाँले अन्य राजनीतिक दलबाट श्रम संस्कृती पार्टीमा खुला मनले आउन चाहने व्यक्तिहरूलाई पार्टीले सच्चा मनले स्वागत गर्ने स्पष्ट पार्नुभयो। पार्टीभित्र अनुशासन, मर्यादा र चेन अफ कमान्डको आधारमा संगठन सञ्चालन हुनुपर्ने उल्लेख गर्दै नेता भन्दा पनि संगठनप्रति उत्तरदायी भएर काम गर्नुपर्नेमा जोड दिनुभयो।
प्रदेश अध्यक्ष राईले प्रदेश १ संगठनलाई अझ चुस्त, दुरुस्त र जवाफदेही बनाउने प्रतिबद्धता व्यक्त गर्दै संगठन सुदृढीकरण, जनतासँग प्रत्यक्ष सम्बन्ध विस्तार तथा वैकल्पिक राजनीतिक शक्तिको निर्माणमा पार्टी निरन्तर अघि बढ्ने बताउनुभयो।
कार्यक्रममा स्थानीय नेता, कार्यकर्ता तथा नयाँ सदस्यहरूको उल्लेखनीय सहभागिता रहेको थियो। सहभागीहरूले श्रम, संस्कार, अनुशासन र जनमुखी राजनीतिक अभ्यासमार्फत समाज परिवर्तन सम्भव रहेको धारणा व्यक्त गरेका थिए।
