हेटौंडा । दिगो र आधुनिक विकासका लागि आमनागरिकको सहभागिता अपरिहार्य हुने भन्दै हेटौंडा उपमहानगरपालिकाले आगामी आर्थिक वर्षको नीति, कार्यक्रम तथा बजेट निर्माणमा नागरिकको सुझाव माग गरेको छ । नगरपालिकाले विकास निर्माणमा नागरिक अपनत्व आवश्यक रहेको उल्लेख गर्दै सबैलाई सक्रिय सहभागिताका लागि आग्रह गरेको हो ।
नगरपालिकाका अनुसार सरोकारवाला निकायले मात्रै देखेको विकासभन्दा नागरिकले प्रत्यक्ष रूपमा खोजेको र आवश्यक ठानेको विकासले दीर्घकालीन प्रभाव पार्ने विश्वास गरिएको छ । नागरिकको आवश्यकता र अपेक्षाअनुसार योजना निर्माण गर्न सके सरकार र नागरिकबीचको सम्बन्ध अझ बलियो बन्ने नगरको भनाइ छ ।
उपमहानगरपालिकाले सार्वजनिक गरेको सूचनामा नागरिकको सहभागिताले विकास योजनालाई प्रभावकारी, पारदर्शी र जनमुखी बनाउन सहयोग पुग्ने उल्लेख गरिएको छ । स्थानीय तहले नीति तथा कार्यक्रम निर्माण गर्दा जनताको सुझावलाई प्राथमिकतामा राख्ने तयारीसमेत गरेको जनाएको छ ।
यसका लागि नगरपालिकाले QR कोड सार्वजनिक गर्दै सबै नगरवासीलाई आफ्नो सुझाव दिन अनुरोध गरेको छ । QR स्क्यान गरी नागरिकले शिक्षा, स्वास्थ्य, सडक, खानेपानी, पर्यटन, रोजगारलगायत विभिन्न क्षेत्रका आवश्यक योजना तथा सुझाव पठाउन सक्ने व्यवस्था गरिएको छ ।
हेटौंडा उपमहानगरपालिकाले आधुनिक र समृद्ध नगर निर्माणका लागि नागरिकको सक्रिय सहभागिता आवश्यक रहेको दोहोर्याउँदै सबैलाई अभियानमा जोडिन आग्रह गरेको छ । नगरले नागरिकको सुझावकै आधारमा आगामी बजेट तथा विकास योजनालाई थप प्रभावकारी बनाइने विश्वास व्यक्त गरेको छ ।
