भक्तपुर । राष्ट्रिय स्वतन्त्र पार्टी भक्तपुर — राष्ट्रिय स्वतन्त्र पार्टी (रास्वपा) भक्तपुर जिल्ला संगठन विभागको सहसंयोजक पदमा रामेश्वर थापा नियुक्त हुनुभएको छ। पार्टीले संगठन विस्तार तथा जिल्ला तहको गतिविधिलाई थप प्रभावकारी बनाउने उद्देश्यसहित थापालाई उक्त जिम्मेवारी प्रदान गरेको जनाएको छ। उहाँको नियुक्तिसँगै पार्टीभित्र नयाँ उत्साह थपिएको स्थानीय नेताकार्यकर्ताले बताएका छन्।
राजनीतिक तथा सामाजिक क्षेत्रमा लामो समयदेखि सक्रिय रहँदै आउनुभएका थापालाई संगठन निर्माण, कार्यकर्ता परिचालन तथा जनसम्पर्क विस्तारमा अनुभव हासिल गरेको व्यक्तिका रूपमा हेरिएको छ। पार्टी स्रोतका अनुसार भक्तपुर जिल्लामा वडा तथा नगर तहसम्म संगठनलाई सशक्त बनाउने, युवालाई राजनीतिमा आकर्षित गर्ने तथा जनताको मुद्दालाई प्राथमिकतामा राखेर अघि बढ्ने जिम्मेवारी उहाँले सम्हाल्ने अपेक्षा गरिएको छ।
नवनियुक्त सहसंयोजक रामेश्वर थापाले आफूलाई दिइएको जिम्मेवारी इमान्दारीपूर्वक पूरा गर्ने प्रतिबद्धता व्यक्त गर्नुभएको छ। उहाँले पार्टीको नीति, सिद्धान्त र सुशासनको अभियानलाई जनस्तरसम्म पुर्याउन सक्रिय भूमिका खेल्ने बताउनुभएको छ। साथै, पार्टीलाई भक्तपुरमा थप बलियो र जनमुखी बनाउन सबै पक्षसँग सहकार्य गरेर अघि बढ्ने उहाँको भनाइ छ।
