काठमाडौं । प्रतिनिधिसभाको बैठक आज बिहान ११ः०० बजे बस्दैछ। बैठकमा सरकारको नीति तथा कार्यक्रममाथिको छलफललाई निरन्तरता दिइने कार्यसूची रहेको छ। राष्ट्रपति रामचन्द्र पाैडेलले सोमबार संघीय संसद्को संयुक्त बैठकमा सरकारको नीति तथा कार्यक्रम प्रस्तुत गरेका थिए।
संसद्को बुधबारको बैठक भने नियमित कार्यसूचीमा प्रवेश नगरी स्थगित भएको थियो। आजको सम्भावित कार्यसूचीअनुसार सरकारको नीति तथा कार्यक्रम निर्णयार्थ प्रस्तुत गरिनेछ। यही अधिवेशनमै आर्थिक वर्ष २०८३/८४ को बजेटसमेत प्रस्तुत हुने तयारी छ।
त्यसैगरी, राष्ट्रियसभाको बैठक पनि बिहान ११ः१५ बजे बस्ने तय भएको छ। बैठकमा सरकारको नीति तथा कार्यक्रममाथिको छलफल जारी रहने सम्भावित कार्यसूची रहेको छ। तर विपक्षी दलहरूले प्रधानमन्त्री संसद्मा अनुपस्थित रहेको विषयलाई लिएर लगातार आपत्ति जनाउँदै आएका छन्।
विशेषगरि श्रम संस्कृति पार्टीले विगत केही दिनदेखि सदनमा प्रधानमन्त्रीको अनिवार्य उपस्थितिको माग गर्दै विरोध प्रदर्शन गर्दै आएको छ। पार्टीका सांसदहरूले सरकार जनताप्रति जवाफदेही बन्नुपर्ने भन्दै प्रधानमन्त्री स्वयं संसद्मा उपस्थित भएर उठेका प्रश्नको जवाफ दिनुपर्ने अडान राखेका छन्।
श्रम संस्कृति पार्टीले बुधबारको बैठकमा समेत नाराबाजीसहित अवरोध गरेको थियो, जसका कारण बैठक नियमित कार्यसूचीमा प्रवेश नगरी स्थगित भएको थियो। पार्टीले आफ्ना माग सम्बोधन नभएसम्म संसद् अवरोधलाई निरन्तरता दिने चेतावनी दिएको छ। यसका कारण आजको बैठक पनि प्रभावित हुने सम्भावना देखिएको छ।
