काठमाडौं । सूचना तथा सञ्चारमन्त्री विक्रम तिमिल्सिनाले हाल सञ्चालनमा रहेका दुई दूरसञ्चार सेवा प्रदायकको विकल्पका रूपमा तेस्रो टेलिकम सेवा प्रदायक भित्र्याउने तयारी सरकारले अघि बढाएको बताएका छन् । सरकारको प्राथमिकतामा नयाँ प्रविधिसहित प्रतिस्पर्धात्मक दूरसञ्चार सेवा विस्तार रहेको भन्दै उनले आवश्यक प्रक्रिया अगाडि बढाइएको जानकारी दिएका हुन् ।
मन्त्री तिमिल्सिनाका अनुसार नेपाल दूरसञ्चार प्राधिकरणले यस विषयमा अध्ययन गर्न विशेष समिति गठन गरिसकेको छ । उक्त समितिले नेपालमा तेस्रो सेवा प्रदायक सञ्चालनको सम्भावना, प्रविधि, लगानी र बजार अवस्थाबारे अध्ययन गरिरहेको उनले बताए । अध्ययन प्रतिवेदन तयार भएपछि सरकारले आवश्यक निर्णय लिने तयारी गरेको जनाइएको छ ।
हाल नेपालमा नेपाल टेलिकम र एनसेल ले सेवा दिँदै आएका छन् । नयाँ सेवा प्रदायक भित्रिएपछि दूरसञ्चार क्षेत्रमा प्रतिस्पर्धा बढ्ने, सेवाको गुणस्तर सुधार हुने तथा उपभोक्ताले थप सुविधा पाउने अपेक्षा गरिएको छ ।
मन्त्री तिमिल्सिनाले नयाँ प्रविधि र डिजिटल पूर्वाधार विस्तारलाई सरकारले विशेष प्राथमिकता दिएको पनि बताए । ग्रामीण तथा दुर्गम क्षेत्रमा गुणस्तरीय इन्टरनेट र मोबाइल सेवा विस्तार गर्न नयाँ लगानी आवश्यक रहेको भन्दै उनले तेस्रो टेलिकम सेवा प्रदायकले त्यसमा महत्वपूर्ण भूमिका खेल्न सक्ने धारणा राखे ।
सरकारले डिजिटल नेपाल अभियानलाई प्रभावकारी बनाउन सूचना प्रविधि र सञ्चार क्षेत्रको सुधारलाई तीव्रता दिएको जनाएको छ । तेस्रो टेलिकम सेवा प्रदायक भित्र्याउने योजना सफल भएमा नेपालमा दूरसञ्चार क्षेत्रमा नयाँ प्रतिस्पर्धा सुरु हुने र उपभोक्ताले सस्तो तथा गुणस्तरीय सेवा पाउने विश्वास गरिएको छ ।
