खाेटाङ। खोटाङको रावा बेसी गाउँपालिका ले नवनिर्मित प्रशासनिक भवन उद्घाटनको सूचना सार्वजनिक गरेसँगै भवन निर्माण भएको जग्गाको स्वामित्वलाई लिएर विवाद चर्किएको छ। गाउँपालिकाले सार्वजनिक गरेको सूचनाअनुसार भोलि प्रशासनिक भवन उद्घाटन कार्यक्रम राखिएको छ।
तर, पीडित पक्षका अनुसार उक्त भवन निर्माण भएको जग्गा स्थानीय चन्द्र बहादुर सार्कीको नाममा रहेको हो। प्रारम्भिक चरणमा ट्रस भवन निर्माण गर्दा “पछि मिलाएर रकम दिने र कानुनी रूपमा पास गरिने” सहमति भएको बताइए पनि हालसम्म जग्गा गाउँपालिकाको नाममा पास नगरिएको आरोप छ।
स्थानीयहरूका अनुसार अहिले सोही जग्गामा स्थायी प्रशासनिक भवन निर्माण भएर उद्घाटनको तयारी भइरहेको छ। तर जग्गाधनीले भने अझैसम्म उचित क्षतिपूर्ति र कानुनी प्रक्रिया पूरा नभएको भन्दै गुनासो गरिरहेका छन्।
पीडित पक्षले प्रश्न उठाएको छ।
“सानो मान्छेले ठूलो मन गरेर जग्गा दियो, तर मूल्य नदिई अर्काको जमिनमा भवन ठड्याएर उद्घाटन गर्ने नैतिकता कसरी आयो ?”
उनीहरूले दलित समुदायको व्यक्तिको जग्गा भएकै कारण बेवास्ता गरिएको हो कि भन्ने आशंका पनि व्यक्त गरेका छन्। “यदि समयमै जग्गाको मूल्य तिरेर कानुनी रूपमा नामसारी गरिएको भए यस्तो विवाद आउने थिएन,” स्थानीयको भनाइ छ।
पीडित पक्षका अनुसार उनीहरूले पटक–पटक पालिकाका प्रतिनिधि तथा सम्बन्धित निकायलाई फोन गरेर न्यायको माग गरे पनि सुनुवाइ नभएको गुनासो गरेका छन्। उनीहरूको आरोप छ कि, “दलितको जग्गा भएकै कारण दबाब र बेवास्ता भइरहेको छ।”
यस विषयले स्थानीय तहको पारदर्शिता, सार्वजनिक संरचना निर्माणमा कानुनी प्रक्रिया, र दलित समुदायप्रतिको व्यवहारबारे गम्भीर प्रश्न उठाएको छ।
यता गाउँपालिकाको तर्फबाट भने यस विषयमा औपचारिक धारणा सार्वजनिक भएको छैन। स्थानीयवासीले भवन उद्घाटनअघि नै जग्गा सम्बन्धी विवाद समाधान गर्न र पीडितलाई न्याय दिन माग गरेका छन्।
