भूमिहीनको अधिकार सुनिश्चित गर्न रास्वपालाई १२ बुँदे मागपत्र

मञ्चका अध्यक्ष ल्यामबहादुर दर्जी ले १२ बुँदे मागपत्र वाचन गर्दै रास्वपाका संसदीय दलका उपनेता गणेश पराजुली मार्फत पार्टी नेतृत्वलाई हस्तान्तरण गरेका हुन् ।

मञ्चका अनुसार २० जिल्लाबाट प्रतिनिधिमूलक रूपमा सहभागी भएका भूमिहीन दलित, भूमिहीन सुकुमबासी तथा अव्यवस्थित बसोबासीका प्रतिनिधिहरूले सरकारबाट बस्ती विस्थापन नगरी व्यवस्थित व्यवस्थापन गर्नुपर्ने माग राखेका थिए । उनीहरूले समस्या समाधानका लागि सरकारसँग सहजीकरण, संवाद र समन्वय गर्न रास्वपाको भूमिका आवश्यक रहेको बताएका छन् ।

प्रतिनिधिहरूसँगको छलफलमा उपनेता पराजुलीले रास्वपा भूमिहीन सुकुमबासीहरूको व्यवस्थापनप्रति प्रतिबद्ध रहेको बताएका छन् । उनले सरकारले हजार दिनभित्र व्यवस्थित व्यवस्थापन गर्ने लक्ष्यसहित आवश्यक प्रक्रिया अघि बढाइसकेको उल्लेख गरे ।

“हामी प्रतिबद्धताअनुसार काम गर्छौँ । कसैलाई पनि भूमिको अधिकारबाट वञ्चित गरिने छैन,” पराजुलीको भनाइ उद्धृत गर्दै मञ्चले जनाएको छ ।

कार्यक्रममा सहभागी प्रतिनिधिहरूले दीर्घकालीन समाधानसहित सुरक्षित आवास, भूमि अधिकार र सम्मानजनक बसोबास सुनिश्चित गर्न सरकार गम्भीर बन्नुपर्ने माग समेत राखेका थिए ।