काठमाडौं ।
काठमाडौं । सांसद ध्रुवराज राई ले सरकारको नीति तथा कार्यक्रम र सुकुमबासी समस्या समाधानमा भइरहेको ढिलाइप्रति असन्तुष्टि जनाएका छन् ।
अर्थ समितिको छलफल कार्यक्रममा बोल्दै उनले अव्यवस्थित बसोबासी र सुकुमबासी नागरिकहरूको समस्या समाधानमा सरकार गम्भीर नदेखिएको आरोप लगाए । उनले दीर्घकालीन योजना र स्पष्ट नीति अभावका कारण वास्तविक पीडितहरू झन् समस्यामा परेको बताएका हुन् ।
सांसद राईले विकास निर्माणका लागि बजेट विनियोजन गर्दा भूगोल र क्षेत्रगत कठिनाइलाई आधार बनाउनुपर्ने आवश्यकता औंल्याए । काठमाडौँ उपत्यकाको तुलनामा भोजपुरलगायत पहाडी तथा दुर्गम जिल्लाहरू भौगोलिक रूपमा बढी चुनौतीपूर्ण रहेको उल्लेख गर्दै उनले त्यस्ता क्षेत्रमा पर्याप्त बजेट सुनिश्चित गर्न सरकारसँग माग गरे ।
उनले दुर्गम क्षेत्रमा सडक, पूर्वाधार तथा सेवा विस्तारको लागत उच्च हुने भएकाले समान ढंगले बजेट बाँडफाँट गर्दा न्यायोचित विकास सम्भव नहुने धारणा राखे ।
यस्तै, सांसद राईले नेपालको आर्थिक वर्ष असार मसान्तमा सकिने वर्तमान प्रणालीले विकास निर्माणमा नकारात्मक असर पारेको टिप्पणी गरे । वर्षायामकै समयमा हतारमा काम सम्पन्न गर्नुपर्ने बाध्यताले निर्माण व्यवसायी र उपभोक्ता दुवै प्रभावित हुने उनले बताए ।
आर्थिक वर्षको समयतालिका परिवर्तन गरी विकास निर्माणलाई मौसमअनुकूल बनाउनुपर्ने सुझाव दिँदै उनले अन्तिम समयमा बजेट खर्च गर्ने प्रवृत्तिका कारण धेरै आयोजना अलपत्र पर्ने गरेको उल्लेख गरे ।
