काठमाडौं । ललितपुरको गाेदावरि नगरपालिका–१२, ठेचो स्थित सोमाङ शैक्षिक गुठी तथा सोअन्तर्गत सञ्चालित सोमाङ एकेडेमीमा लामो समयदेखि चल्दै आएको विवादमा जिल्ला प्रशासन कार्यालय ललितपुरले हस्तक्षेप गर्दै नयाँ व्यवस्थापन प्रक्रिया अघि बढाएको छ।
ललितपुर जिल्ला प्रशासनले हालै जारी गरेको पत्रमार्फत संस्थाको वैधानिकता, कार्यसमिति र स्वामित्वसम्बन्धी विवाद समाधानका लागि जितबहादुर घलेको संयोजकत्वमा पाँच सदस्यीय तदर्थ समिति गठन गरेको हो। यससँगै विगतदेखि विवादमा तानिएका डा. तिर्थ थापाको प्रभाव अन्त्य हुने तथा संस्थाको सञ्चालन अधिकार पुनः घले पक्षतर्फ फर्किने भएकाे छ।
यस अघि २०८० फागुन १७ गते onlinedabali.comमा प्रकाशन गरिएकाे समाचार अनुसार सोमाङ शैक्षिक गुठी र सोमाङ एकेडेमीमाथि डा. तिर्थ थापाले किर्ते कागजात तथा प्रशासनिक पहुँचको दुरुपयोग गर्दै कब्जा जमाएको खुलेकाे थियाे ।
स्रोतका अनुसार २०५९ सालदेखि विभिन्न व्यक्तिहरूले नेतृत्व गर्दै आएको गुठीमा डा. थापाले २०६२ साल माघ ११ गतेसम्म नेतृत्व गरेका थिए। कार्यकाल समाप्त भएपछि पनि उनले संस्थामाथि प्रभाव कायम राख्न विभिन्न गतिविधि जारी राखेको आरोप लागेको थियो।
२०६८ साल चैत २ गते जितबहादुर घलेको नेतृत्वमा सोमाङ क्लब तथा सोमाङ शैक्षिक गुठीको वैधानिक कार्यसमिति चयन भएपछि विवाद थप चर्किएको थियाे। घले पक्षका अनुसार डा. थापा समूहले विद्यालयमा तालाबन्दी गर्ने, व्यवस्थापन अवरुद्ध पार्ने तथा तत्कालीन जिल्ला शिक्षा कार्यालयसँगको मिलेमतोमा अवैधानिक ढंगबाट विद्यालय व्यवस्थापन समिति परिवर्तन गर्ने प्रयास गरेको थियो।
त्यसबेला घले पक्षले किर्ते माइन्युट प्रयोग गरी पद्मिनी प्रधानाङ्गलाई विद्यालय व्यवस्थापन समितिको अध्यक्ष बनाइएको भन्दै आपत्ति जनाएको थियो। साथै, २०७१ सालमा समाज कल्याण परिषद् र जिल्ला प्रशासन कार्यालय ललितपुरमा भ्रष्टाचार तथा अनियमितताको छानबिन माग गर्दै निवेदनसमेत दर्ता गरिएको थियो। भने, घलेलाई झण्डै १२ लाख रकम पारिश्रमिक समेत पाउनबाट थापाले राेकेकाे घलेकाे दाबी छ।
यही विवाद र उजुरीका आधारमा जिल्ला प्रशासन कार्यालय ललितपुरले दुवै पक्षबाट पेश भएका कागजात, विधान र प्रमाण अध्ययन गरेपश्चातकाे निष्कर्षअनुसार २०७९ साल फागुन १९ गतेको साधारण सभाबाट निर्वाचित कार्यसमितिको कार्यकाल समाप्त भइसकेको, नयाँ कार्यसमिति चयन प्रक्रिया स्पष्ट नभएको तथा सदस्यता नवीकरण र संस्थागत प्रक्रिया विधानअनुसार नभएको देखिएको पत्रमा उल्लेख छ।
प्रशासनले संस्था दर्ता ऐन, २०३४ तथा सम्बन्धित नियमावली अनुसार पुरानो कार्यसमिति स्वतः निष्क्रिय भएको ठहर गर्दै अब तीन महिना भित्र साधारण सभा गरी नयाँ कार्यसमिति चयन गर्न निर्देशन दिएको छ। त्यस अघिसम्म संस्थाको दैनिक प्रशासनिक तथा व्यवस्थापकीय काम सञ्चालन गर्न पाँच सदस्यीय तदर्थ समिति समेत जिल्गला प्रशासन कार्यालय ललितपुरले गरिदिएको हो।
प्रशासन द्वारा गठित तदर्थ समितिमा:
संयोजक : जितबहादुर घले
सदस्य : सुनिल मास्के
सदस्य : हेम थापा
सदस्य : शान्तकृष्ण श्रेष्ठ
सदस्य : विद्या माताकार
रहेका छन्।
जिल्ला प्रशासन कार्यालय ललितपुरको यो निर्णयसँगै लामो समयदेखि विवादित बनेको साेमाङ हाेप,सोमाङ गुठी तथा सोमाङ एकेडेमीको व्यवस्थापन अब घले नेतृत्वको तदर्थ समितिमार्फत सञ्चालन हुने भएको छ। साथै, विगतमा उठाइएका किर्ते, जालसाजी तथा संस्थागत हस्तक्षेप सम्बन्धी आरोपहरूको प्रभावस्वरूप डा. तिर्थ थापाको संस्थामाथिको नियन्त्रण अन्त्यतर्फ पुगेको छ।
