काठमाडौं । आमूल परिवर्तन रिपब्लिकन पार्टी नेपालका अध्यक्ष भरत गिरी ले नेपालले राष्ट्रिय हित, सार्वभौमिकता र ऐतिहासिक वास्तविकतालाई केवल भावनात्मक दृष्टिकोणबाट होइन, दीर्घकालीन रणनीति र दूरदृष्टिका आधारमा अघि बढाउनुपर्ने बताएका छन्।
उनले वर्तमान समयमा नेपालमा लिपुलेक र लिम्पियाधुराको विषयमा मात्र केन्द्रित बहस भइरहेको उल्लेख गर्दै इतिहासको व्यापक सन्दर्भमा “ग्रेटर नेपाल” को मुद्दामाथि गम्भीर अध्ययन, अनुसन्धान र कूटनीतिक पहल आवश्यक रहेको धारणा व्यक्त गरेका हुन्।
गिरीले ब्रिटिस साम्राज्यले उपनिवेशवादी शक्तिको प्रयोग गरी नेपालका विभिन्न भूभाग कब्जा गरेको दाबी गर्दै ब्रिटिस भारतबाट बाहिरिँदा नेपालले आफ्नो ऐतिहासिक भूभागबारे सशक्त राष्ट्रिय बहस र कूटनीतिक पहल गर्नुपर्ने अवस्था रहेको बताए। उनका अनुसार सतलजदेखि टिस्टासम्मको ऐतिहासिक सन्दर्भ नेपाली जनताको भावना र राष्ट्रिय इतिहाससँग जोडिएको विषय हो।
उनले नेपालले कसैको भूमि नचाहेको स्पष्ट पार्दै आफ्नो ऐतिहासिक तथा वैधानिक अधिकारको विषय उठाउनु विस्तारवाद नभई राष्ट्रिय स्वाभिमानको विषय भएको बताए। नेपाल सरकारले केवल लिपुलेक–लिम्पियाधुराको सीमित बहसभन्दा माथि उठेर “ग्रेटर नेपाल” सम्बन्धी ऐतिहासिक बहसलाई अन्तर्राष्ट्रिय स्तरमा अध्ययन र कूटनीतिक माध्यमबाट उठाउनुपर्ने उनको भनाइ छ।
गिरीले भावनात्मक दबाबमा हतारमा गरिने कुनै पनि सम्झौताले भविष्यमा नेपालको ऐतिहासिक दाबी कमजोर बन्न सक्ने चेतावनीसमेत दिएका छन्। “सानो भूभागको खोजीमा ठूलो ऐतिहासिक अधिकार गुम्न नदिन सरकार गम्भीर हुनुपर्छ,” उनले भने।
उनले नेपाललाई आर्थिक, सैनिक, कूटनीतिक तथा प्राविधिक रूपमा सशक्त र आत्मनिर्भर राष्ट्र बनाउनुपर्नेमा जोड दिँदै बलियो राष्ट्र बनेपछि मात्र इतिहाससँग सम्बन्धित बाँकी प्रश्नहरू सम्मानजनक रूपमा उठाउन सकिने धारणा राखे।
“कमजोर राष्ट्रको आवाज संसारले कम सुन्छ, तर शक्तिशाली राष्ट्रको इतिहास पनि सुनिन्छ र अधिकार पनि स्थापित हुन्छ,” गिरीको भनाइ छ।
उनले वर्तमान सरकार तथा राष्ट्रिय स्वाभिमानका विषयमा बोल्ने राजनीतिक नेतृत्वसँग यस विषयमा गम्भीर राष्ट्रिय बहस र पहलको अपेक्षा गरेका छन्।
