खाेटाङ। नेपाली कांग्रेसले खोटाङ जिल्लाका पूर्व सभापति विष्णु कुमार राई (आभूषण) माथिको कारबाही फुकुवा गर्दै पुनः जिल्ला सभापतिको जिम्मेवारी दिएको छ। पार्टीको पछिल्लो निर्णयसँगै राई पुनः सक्रिय भूमिकामा फर्किनुभएको हो।
राईमाथि २०७९ सालको निर्वाचनका क्रममा नेपाली कांग्रेसका आधिकारिक उम्मेदवारलाई असहयोग गरेको आरोप लागेको थियो। सोही आरोपका आधारमा तत्कालीन सभापति रहेका राईलाई पार्टीले कारबाही गरेको थियो। त्यसयता उहाँ संगठनात्मक जिम्मेवारीबाट बाहिर रहँदै आउनुभएको थियो।
पार्टीले हाल उक्त कारबाही फुकुवा गरेपछि राईलाई पुनः जिल्ला नेतृत्वको जिम्मेवारी सुम्पिएको जनाएको छ। यस निर्णयलाई खोटाङ कांग्रेसभित्र संगठन सुदृढीकरण र पुराना नेताहरूलाई पुनः सक्रिय बनाउने प्रयासका रूपमा हेरिएको छ।
विष्णु कुमार राई खोटाङ कांग्रेसका पुराना तथा प्रभावशाली नेताका रूपमा परिचित हुनुहुन्छ। उहाँको पुनरागमनले जिल्लाको पार्टी गतिविधिमा नयाँ ऊर्जा थपिने अपेक्षा गरिएको छ। स्थानीय तहदेखि जिल्ला तहसम्म कांग्रेस कार्यकर्तामाझ पनि यस निर्णयलाई चासोका साथ हेरिएको छ।
कारबाही फुकुवा र पुनः जिम्मेवारी दिएपछि अब खोटाङ कांग्रेसभित्र आन्तरिक एकता मजबुत हुने विश्वास गरिएको छ। आगामी राजनीतिक गतिविधि र संगठन विस्तारमा राईको भूमिका महत्वपूर्ण रहने पार्टी नेताहरूको भनाइ छ।
