काठमाडौ । श्रम संस्कृति पार्टीका अध्यक्ष तथा सुनसरी १ बाट प्रत्येक्ष निर्वाचित संसद सदस्य हर्कराज राईले सरकारको कार्यशैलीमाथि गम्भीर प्रश्न उठाउँदै खुला पत्र सार्वजनिक गरेका छन्। उनले संसदलाई बेवास्ता गर्दै निर्णय लिइएको आरोप लगाउँदै राष्ट्रिय सरोकारका विषयमा स्पष्ट जवाफ दिन सरकारसँग माग गरेका छन्।
पत्रमा उनले नेपाल–भारत सीमासम्बन्धी विषय, विशेषगरी लिपुलेक–मानसरोवर सडक विस्तारमा सरकारको निष्क्रियता प्रति असन्तुष्टि व्यक्त गरेका छन्। सीमा सुरक्षामा कमजोरी भएको र कूटनीतिक पहल प्रभावकारी नभएको उनको आरोप छ।
त्यस्तै, उनले सीमा क्षेत्रमा सेना परिचालन नगरेको, अतिक्रमण बढ्दै गएको तथा राष्ट्रिय स्वाभिमानसँग जोडिएका विषयमा सरकार मौन बसेको भन्दै आलोचना गरेका छन्। यस्ता संवेदनशील मुद्दामा तत्काल कदम चाल्नुपर्ने उनको माग छ।
राईले विपद् व्यवस्थापन, सुकुम्बासी समस्या र विकास निर्माणमा देखिएको ढिलासुस्तीप्रति पनि प्रश्न उठाएका छन्। विदेशी ऋण लिएर देश चलाउने प्रवृत्ति रोक्न र आर्थिक अवस्था सुधार्न ठोस योजना आवश्यक रहेको उनले बताएका छन्।
