काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले सरकारी जग्गामा बनेका अनधिकृत संरचना हटाउने क्रममा कुनै पनि नागरिकलाई घरबारविहीन बन्न नदिने स्पष्ट पारेका छन्।
आइतबार पार्टी केन्द्रीय कार्यालयमा सञ्चारकर्मीहरूसँग कुरा गर्दै उनले अव्यवस्थित बसोबास तथा भूमिहीन सुकुमवासीको विषयलाई व्यवस्थित ढंगले समाधान गरिने बताए। उनका अनुसार यसका लागि शक्तिशाली प्राधिकरण वा आयोग गठन गरी त्यसले गर्ने निर्णय कार्यान्वयनमा ल्याइनेछ।
लामिछानेले विशेषगरी नदी किनार, बाढी तथा पहिरोको उच्च जोखिमयुक्त क्षेत्रमा बसोबास गरिरहेका नागरिकलाई यथाशीघ्र सुरक्षित स्थानमा स्थानान्तरण गर्नुपर्ने आवश्यकता औंल्याए। “खतरापूर्ण स्थानमा बसेका नागरिकलाई छिटो सुरक्षित ठाउँमा सार्नुपर्छ, तर त्यसक्रममा कसैलाई पनि घरबारविहीन बनाइँदैन,” उनले भने।
उनले असुरक्षित बसोबासबारे सरकारले पहिले नै सूचना जारी गरिसकेको उल्लेख गर्दै काठमाडौं मात्र होइन, देशैभरका भूमिहीन सुकुमवासीका लागि समान सन्देश प्रवाह गरिएको बताए। साथै, नागरिकलाई आतंकित पार्ने किसिमको प्रचारप्रसार भएको भन्दै त्यसमा कुनै सत्यता नभएको दाबी गरे।
सरकारको निर्णय जनताको सुरक्षालाई प्राथमिकतामा राखेर गरिएको उल्लेख गर्दै उनले व्यवस्थापन प्रक्रियालाई मानविक र व्यवस्थित बनाइने प्रतिबद्धता व्यक्त गरे।
