काठमाडौं । काठमाडौँस्थित चन्द्रागिरी नगरपालिका वडा नम्बर १ का वडाध्यक्ष हरिश्याम रानामगरले वडा कार्यालयमा सेवाग्राहीलाई प्रभावकारी र गुणस्तरीय सेवा दिन कर्मचारीहरूलाई समयमै उपस्थित हुन निर्देशन दिएका छन्।
सूचना चाैतारी डट कम सँग कुरा गर्दै उनले सेवा प्रवाहलाई छिटो, सहज र व्यवस्थित बनाउन यस्तो कदम चालिएको स्पष्ट पारे। उनका अनुसार वडा कार्यालयबाट प्रदान गरिने सेवाहरू हाल छरितो र व्यवस्थित रूपमा सञ्चालन भइरहेका छन् र सेवाग्राहीहरूबाट उल्लेख्य गुनासोसमेत आएको छैन। उनले सेवा प्रणालीलाई अझ प्रभावकारी बनाउन आवश्यक सुधारका कामहरू निरन्तर अघि बढाइएको जानकारी दिए। “सेवाग्राहीले सहज रूपमा सेवा पाउनु हाम्रो पहिलो प्राथमिकता हो,” उनले भने।
वडाध्यक्ष रानामगरले वडा कार्यालयको कामकारबाहीलाई थप पारदर्शी, उत्तरदायी र सेवामुखी बनाउन कर्मचारीहरूलाई जिम्मेवार ढंगले काम गर्न आग्रह गरेका छन्। उनले जनताको विश्वास कायम राख्न प्रशासनिक सुधार अनिवार्य रहेको उल्लेख गरे।
यसैबीच, उनले आफ्नो कार्यक्षेत्रभित्र रहेका सार्वजनिक सम्पत्तिको संरक्षणमा कडाइ गरिने चेतावनीसमेत दिएका छन्। खोला, नाला, सार्वजनिक जग्गा तथा वनजंगलको अतिक्रमण कुनै पनि अवस्थामा स्वीकार्य नहुने उनको भनाइ छ। “खोला आफ्नो प्राकृतिक बहावमै बग्नुपर्छ, सार्वजनिक जग्गा सरकारकै हुनुपर्छ र वनजंगल जनताकै सम्पत्ति हो,” उनले स्पष्ट पारे। यदि कतै अतिक्रमण वा अनियमितता भेटिएमा कानुनअनुसार कडा कारबाही गरिने उनले चेतावनी दिएका छन्।
