काठमाडौं । श्रम संस्कृति पार्टीका महासचिव तथा प्रतिनिधिसभा सदस्य आरेन राईले संविधान संशोधनको बहसपत्र तयारी समितिको कामप्रति समावेशीताको सवाल उठाएका छन्। सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले आज समितिले विज्ञहरूसँग छलफल गरेको भए पनि सहभागिता पर्याप्त समावेशी नदेखिएको टिप्पणी गरेका हुन्।
राईले संयोजक तथा समितिको टिमलाई भूगोल, समुदाय र लिङ्गका आधारमा विविधता झल्किने गरी थप विज्ञहरू समेट्न अनुरोध गरेका छन्। संविधान जस्तो महत्वपूर्ण विषयमा हुने बहसमा सबै पक्षको प्रतिनिधित्व आवश्यक हुने उल्लेख गर्दै उनले व्यापक परामर्शबाट मात्र सन्तुलित र दीर्घकालीन समाधान निस्कने विश्वास व्यक्त गरेका छन्।
साथै, उनले विभिन्न क्षेत्रका विज्ञ समूहलाई पनि यसपटकको संविधान संशोधन प्रक्रियामा सक्रिय रूपमा ध्यान दिन र आफ्नो सुझाव प्रस्तुत गर्न आग्रह गरेका छन्। संविधान संशोधनको बहसलाई समावेशी, सहभागितामूलक र प्रभावकारी बनाउन सबै सरोकारवालाको भूमिका महत्वपूर्ण रहने उनको भनाइ छ।
