काठमाडौं । चर्चित व्यवसायी शेखर गोल्छा लाई प्रहरीले पक्राउ गरेको छ। प्रहरीको केन्द्रीय अनुसन्धान ब्युरो (CIB) का प्रमुख मनोज केसी ले उनलाई नक्साल क्षेत्रबाट नियन्त्रणमा लिइएको जानकारी दिएका छन्। अदालतको आदेशअनुसार अनुसन्धानका लागि उनलाई पक्राउ गरिएको जनाइएको छ।
जिल्ला अदालत काठमाडौंले जारी गरेको पुर्जीका आधारमा गोल्छालाई पक्राउ गरिएको ब्युरोले जनाएको छ। उनीमाथि हाल सेयर कारोबारसँग सम्बन्धित विवादास्पद गतिविधिमा संलग्न भएको आशंकामा अनुसन्धान भइरहेको छ। प्रहरीले आवश्यक प्रमाण संकलन गर्दै थप अनुसन्धान अघि बढाएको जनाएको छ।
यसअघि विवादमा तानिएका व्यवसायीहरू दीपक भट्ट र सुलभ अग्रवाल लगायतको समूहसँग मिलेमतोमा सेयर कारोबार भएको विषय सार्वजनिक भएको थियो। सोही प्रकरणमा धितोपत्र बोर्डले जाँचबुझ तथा सुपरिवेक्षण प्रतिवेदन तयार पारेको थियो।
उक्त प्रतिवेदनमा गोल्छासहित ६ जनाबीच मिलेमतो भएको आशंका गरिएको उल्लेख छ। यस प्रकरणले नेपालको पूँजी बजारमा पारदर्शिता र नियमनको विषयमा फेरि बहस चुलिएको छ भने अनुसन्धानको निष्कर्षले आगामी दिनमा थप कानुनी प्रक्रिया अघि बढ्ने संकेत गरेको छ।
