खोटाङ । राष्ट्रिय स्वतन्त्र पार्टी (रास्वपा) खोटाङले जिल्ला स्तरमा समन्वय र विकास गतिविधिलाई तीव्रता दिने उद्देश्यसहित “जिल्ला समन्वय समिति” गठन गरेको छ। २०८३ बैशाख १० गते जारी सूचनाअनुसार जिल्ला भित्रका समस्या समाधान, विकास योजनाको प्रभावकारी कार्यान्वयन तथा सरकार र जनताबीच समन्वय मजबुत बनाउन समिति गठन गरिएको जनाइएको छ।
समितिले एकद्वार प्रणालीमार्फत सेवा प्रवाहलाई व्यवस्थित, सरल र प्रभावकारी बनाउने लक्ष्य लिएको छ। साथै, जनताका गुनासा, सुझाव तथा विकाससम्बन्धी आवश्यकतालाई एकीकृत रूपमा संकलन गरी सम्बन्धित निकायसम्म पुर्याउने र समाधान प्रक्रियालाई छिटो तथा सहज बनाउने प्रतिबद्धता व्यक्त गरिएको छ। यसले जिल्लाको समग्र विकासमा सक्रिय भूमिका खेल्ने अपेक्षा गरिएको छ।
समितिमा विभिन्न जिम्मेवारीसहित मिलन कडरिया, गोविन्द भुजेल, भगवती रोका, टेक बहादुर थापा मगर, भरत घिमिरे, बलराम कार्की, सरोज बन तथा सीतादेवी राई ‘शीतल’ लगायतलाई समेटिएको छ। उनीहरूलाई संगठन विस्तार, जनसम्पर्क तथा समन्वयको जिम्मेवारी प्रदान गरिएको सूचनामा उल्लेख छ।
रास्वपा खोटाङका सभापति मुकुन्द कृष्ण थापाद्वारा हस्ताक्षरित उक्त सूचनामा समिति गठनसँगै जिल्लामा सेवा प्रवाहलाई चुस्त, पारदर्शी र जनमैत्री बनाउने विश्वास व्यक्त गरिएको छ। पार्टीले यस पहललाई स्थानीय स्तरमा प्रभावकारी शासन र विकासका लागि महत्वपूर्ण कदमका रूपमा लिएको जनाएको छ।
