काठमाडौं । सरकारले विभिन्न कानुनी संशोधन, नियुक्ति तथा सिफारिससम्बन्धी महत्वपूर्ण निर्णयहरू गरेको छ। सोमबार बसेको मन्त्रिपरिषद् बैठकले आर्थिक, प्रशासनिक तथा निर्वाचन प्रणालीसँग सम्बन्धित विषयहरूमा निर्णय गर्दै कार्यान्वयन प्रक्रिया अघि बढाएको हो।
बैठकले नेपाल धितोपत्र बोर्डको अध्यक्ष नियुक्तिका लागि सिफारिस समिति गठन गर्ने निर्णय गरेको छ। राष्ट्रिय योजना आयोगका उपाध्यक्ष डा. गुणाकर भट्टको संयोजकत्वमा गठन गरिएको उक्त समितिमा अर्थ सचिव घनश्याम उपाध्याय र भूवन कुमार दाहाल सदस्य रहनेछन्। समितिले अध्यक्ष पदका लागि योग्य उम्मेदवार सिफारिस गर्नेछ।
त्यस्तै, सरकारले नेपाल विशेष सेवा ऐन २०४२ लाई संशोधन गर्न बनेको विधेयक संघीय संसद्मा पेश गर्न स्वीकृति दिएको छ। यस संशोधनमार्फत विशेष सेवासम्बन्धी व्यवस्थालाई समयसापेक्ष बनाउने उद्देश्य राखिएको छ।
यस्तै, प्रतिनिधिसभा सदस्य निर्वाचन ऐन २०७४ संशोधन गर्न बनेको विधेयक पनि संसद्मा पेश गर्न स्वीकृत गरिएको छ। निर्वाचन प्रणालीलाई थप व्यवस्थित र प्रभावकारी बनाउन कानुनी सुधार आवश्यक रहेको सरकारको निष्कर्ष छ।
मन्त्रिपरिषद्ले मतदाता नामावली ऐन २०७३ संशोधन गर्न बनेको विधेयक पनि संघीय संसद्मा पेश गर्न अनुमति दिएको छ। यसले मतदाता दर्ता तथा व्यवस्थापन प्रक्रियालाई अझ पारदर्शी र विश्वसनीय बनाउने अपेक्षा गरिएको छ।
यसैगरी, समस्याग्रस्त सहकारी व्यवस्थापन समितिमा नयाँ पदाधिकारी नियुक्त गरिएको छ। समितिको अध्यक्षमा प्युठानका डिल्लिराज आचार्य नियुक्त भएका छन् भने सदस्यमा धादिङका नवराज सिम्खडा र ललितपुरका रोशनबहादुर शाक्य मनोनयन भएका छन्। सरकारले सहकारी क्षेत्रको सुधार र व्यवस्थापनलाई प्रभावकारी बनाउन यो निर्णय गरेको जनाएको छ।
