काठमाडौं । प्रतिनिधिसभाकी उपसभामुख रुबि कुमारी ठाकुरले मधेस क्षेत्रमा अझै कायम रहेको दाइजो प्रथाविरुद्ध कडा धारणा सार्वजनिक गरेकी छन्। उनले पछिल्लो समय आफूलाई प्राप्त भएका विवाहका निमन्त्रणापत्रहरूमा “दहेज मुक्त विवाह” भन्ने उल्लेख नदेखिएको भन्दै समाज अझै पूर्ण रूपमा यो कुरीतिबाट मुक्त हुन नसकेको संकेत गरेको बताएकी हुन्।
ठाकुरले दाइजो लिनु वा दिनु मात्र होइन, दाइजोको लेनदेनमा आधारित विवाहलाई स्वीकार गर्नु, त्यस्ता कार्यक्रममा सहभागी हुनु वा भोज ग्रहण गर्नु समेत सामाजिक रूपमा अस्वीकार्य र कानुनी रूपमा दण्डनीय अभ्यास भएको स्पष्ट पारेकी छन्। उनका अनुसार यस्तो प्रथाले महिलाको सम्मान, समानता र मौलिक अधिकारमाथि प्रत्यक्ष असर पार्ने गर्दछ।
उनले सामाजिक परिवर्तनका लागि व्यक्तिगत स्तरबाटै पहल आवश्यक रहेकोमा जोड दिँदै सानो प्रयासले पनि ठूलो रूपान्तरण सम्भव हुने उल्लेख गरिन्। “यदि हामी साँच्चिकै समाज परिवर्तन चाहन्छौं भने परिवर्तनको सुरुवात आफैंबाट गर्नुपर्छ,” उनले भनिन्।
उपसभामुख ठाकुरले दाइजो लेनदेन भएको विवाहमा आफू सहभागी नहुने घोषणा गर्दै यस प्रकारका कार्यक्रमलाई बहिष्कार गर्नुपर्ने धारणा राखेकी छन्। उनले दहेजमुक्त, समानतामा आधारित र सुसंस्कृत विवाह प्रणालीलाई प्रोत्साहन गर्न सबैलाई आह्वान समेत गरेकी छन्।
साथै, उनले विवाह निमन्त्रणापत्रमै “दहेज मुक्त विवाह, दाइजो लिनु र दिनु सामाजिक तथा कानुनी अपराध हो” भन्ने सन्देश स्पष्ट रूपमा समावेश गर्न आग्रह गर्दै दाइजोमुक्त समाज निर्माणतर्फ सामूहिक प्रयास आवश्यक रहेको उल्लेख गरेकी छन्।
