काठमाडौं । सांसदहरूले स्वकीय सचिव राख्ने निर्णयप्रति श्रम संस्कृति पार्टीका अध्यक्ष एवं प्रतिनिधिसभा सदस्य हर्क साम्पाङ राईले कडा आपत्ति जनाएका छन्। सामाजिक सञ्जालमार्फत आफ्नो धारणा सार्वजनिक गर्दै उनले यस्तो निर्णयले राज्यकोषमा अनावश्यक आर्थिक भार थप्ने बताएका हुन्।
उनले गणनासहित खर्चको विवरण प्रस्तुत गर्दै स्वकीय सचिवका लागि मासिक ३० हजार रुपैयाँ तलब तोकिए पनि कुल खर्च अत्यधिक हुने उल्लेख गरेका छन्। उनका अनुसार उक्त व्यवस्था लागू भएमा मासिक ८२ लाख ५० हजार रुपैयाँ, वार्षिक ९ करोड ९० लाख रुपैयाँ र पाँच वर्षमा झण्डै ४९ करोड ५० लाख रुपैयाँ खर्च हुने देखिन्छ।
साम्पाङले यस्तो निर्णयले देशको आर्थिक अवस्थालाई झन् दबाबमा पार्ने भन्दै जनताको करबाट संकलित रकम खर्च गर्दा जिम्मेवार हुनुपर्नेमा जोड दिएका छन्। उनले विकास निर्माण, रोजगारी र आधारभूत सेवामा लगानी गर्नुपर्ने समयमा यस्ता सुविधा थप्नु उपयुक्त नहुने धारणा राखेका छन्।
उनले सरकार र संसदलाई खर्च कटौतीतर्फ ध्यान दिन आग्रह गर्दै जनमुखी नीतिमा केन्द्रित हुनुपर्ने बताएका छन्। स्वकीय सचिव राख्ने निर्णय पुनर्विचार गर्नुपर्ने उनको माग छ।
