काठमाडौं । त्रिभुवन पार्कमा नयाँ वर्षको अवसरमा रिपोर्टिङका लागि पुगेका एक फोटो पत्रकारमाथि अभद्र व्यवहार भएको घटनाले प्रेस स्वतन्त्रतामाथि गम्भीर प्रश्न उठाएको छ। समष्टि नेपाल मिडियामा आबद्ध फोटो पत्रकार उत्तम तामाङमाथि पार्कका टिकट चेकरले दुर्व्यवहार गरेको जनाइएको छ।
नयाँ वर्षका अवसरमा पिकनिक मनाउन आएका सर्वसाधारणहरूले पार्क व्यवस्थापनले साना बालबालिका तथा जेष्ठ नागरिकलाई समेत टिकटमा छुट नदिएको गुनासो गरेपछि उक्त विषयमा समाचार संकलन गर्न पत्रकार तामाङ पार्क पुगेका थिए। तर, रिपोर्टिङकै क्रममा पार्कभित्र प्रवेश गर्न खोज्दा टिकट चेकरले टिकट अनिवार्य भएको भन्दै उनलाई अवरोध गरेको बताइएको छ।
पत्रकार तामाङका अनुसार उनले आफू पत्रकार भएको स्पष्ट पार्दै परिचयपत्र (आईडी कार्ड) देखाउनुका साथै रिपोर्टिङ सामग्रीसहित उपस्थित हुँदासमेत टिकट चेकरले बेवास्ता गर्दै अभद्र व्यवहार गरेका थिए। “पेशागत जिम्मेवारी पूरा गर्न खोज्दा यस्तो व्यवहार हुनु दुःखद हो,” उनले भने।
घटनाप्रति सञ्चार क्षेत्रका सरोकारवालाहरूले गम्भीर ध्यानाकर्षण भएको जनाउँदै यस्तो व्यवहारले प्रेस स्वतन्त्रताको अभ्यासमै अवरोध सिर्जना गर्ने बताएका छन्। उनीहरूले घटनाको निष्पक्ष छानबिन गरी दोषीमाथि कारबाही गर्न सम्बन्धित निकायसँग माग गरेका छन्।
