काठमाडौँ । श्रम संस्कृति पार्टीका अध्यक्ष एवं धरान उपमहानगरपालिकाका प्रमुख हर्क साम्पाङले आफ्नो सम्पत्ति विवरणबारे सामाजिक सञ्जालमार्फत स्पष्टिकरण दिएका छन्। पछिल्लो समय आफ्नो सम्पत्तिलाई लिएर चासो र चर्चा बढ्न थालेपछि उनले फेसबुकमार्फत पैतृक तथा व्यक्तिगत सम्पत्तिको फेहरिस्त सार्वजनिक गर्ने घोषणा गरेका हुन्।
उनले आफ्नो नाममा कुनै पनि व्यक्तिगत सम्पत्ति नरहेको दाबी गर्दै पुर्ख्यौली सम्पत्तिको रूपमा खोटाङको केपिलासगढी गाउँपालिका–२ चोखाने गाउँमा केही खेतबारी मात्र रहेको उल्लेख गरेका छन्। ‘मेरो बाउबाजेले कमाएको पैतृक सम्पत्ति आमाको नाममा छ, जहाँ पाखारेखा, खरबारी, बाँस र उतिस घारीहरू छन्,’ साम्पाङले लेखेका छन्।
उनका अनुसार उक्त पुर्ख्यौली थलो भिरालो पाखामा रहेको छ र परिवारभित्र हालसम्म अंशबण्डा नभएको अवस्था छ। दाजुभाइ तथा दिदीबहिनीहरूबीच सम्पत्ति बाँडफाँड नगरेको स्पष्ट पार्दै उनले आफूले व्यक्तिगत रूपमा कुनै अचल सम्पत्ति आर्जन नगरेको बताएका छन्।
व्यक्तिगत कमाइबारे उनले वैदेशिक रोजगारीका क्रममा जोडेको ४ देखि ५ तोला सुन र बैंक खातामा करिब २ देखि ४ लाख रुपैयाँसम्म मौज्दात हुन सक्ने जानकारी दिएका छन्। आफ्नो आर्थिक अवस्था साधारण रहेको उल्लेख गर्दै उनले आफूले सधैँ जनताकै पक्षमा काम गर्दै आएको दाबी गरेका छन्।
साम्पाङले केही दिनभित्रै आफ्नो सम्पत्ति विवरण औपचारिक रूपमा सार्वजनिक गर्ने प्रतिबद्धता जनाएका छन्। पारदर्शिता र जवाफदेहितालाई प्राथमिकता दिँदै आएका उनले सम्पत्ति विवरण माग गर्नेहरूलाई लक्षित गर्दै तथ्यमा आधारित विवरण सार्वजनिक गर्ने बताएका हुन्।
उनको यो अभिव्यक्तिपछि सामाजिक सञ्जालमा विभिन्न प्रतिक्रिया देखिन थालेका छन्। कतिपयले उनको पारदर्शिताको प्रशंसा गरेका छन् भने केहीले औपचारिक विवरण सार्वजनिक भएपछि मात्र यथार्थ स्पष्ट हुने बताएका छन्। यसले स्थानीय तहका जनप्रतिनिधिहरूको सम्पत्ति पारदर्शिताबारे बहसलाई थप तीव्र बनाएको छ।
विशेषगरी जनप्रतिनिधिहरूको जीवनशैली र सम्पत्ति विवरणबीचको सम्बन्धबारे नागरिकस्तरमा चासो बढिरहेका बेला साम्पाङको यो कदमलाई अर्थपूर्ण रूपमा हेरिएको छ। आगामी दिनमा उनले सार्वजनिक गर्ने औपचारिक विवरणले यस विषयमा उठेका जिज्ञासाहरूको स्पष्ट जवाफ दिने अपेक्षा गरिएको छ।
