काठमाडौं । ड्युटी सकेर घर फर्कँदै गरेका एक ट्राफिक प्रहरी अधिकृत सडक दुर्घटनामा परेर गम्भीर घाइते भएका छन्। ३२ वर्षीय ट्राफिक प्रहरी इन्सपेक्टर अभय लामा गएराति करिब ११:१५ बजे मोटरसाइकलमा घर फर्किँदै गर्दा ट्रकको ठक्करबाट घाइते भएका हुन्।
प्रहरीका अनुसार लामा सवार बागमती प्रदेश ०२-०२९ प ९४१५ नम्बरको मोटरसाइकललाई बागमती प्रदेश ०३-००१ ख १७१५ नम्बरको ट्रकले ठक्कर दिएको हो। दुर्घटना तारकेश्वर नगरपालिका–८, डाँडागाउँस्थित सडक खण्डमा भएको जनाइएको छ।
नेपालटारबाट फुटुङतर्फ जाँदै गरेका लामालाई विपरीत दिशाबाट आएको ट्रकले ठक्कर दिएको प्रारम्भिक अनुसन्धानबाट खुलेको छ। ठक्करपछि गम्भीर घाइते भएका लामाको तत्काल उद्धार गरी उपचारका लागि त्रिवि शिक्षण अस्पताल लगिएको थियो।
त्रिवि शिक्षण अस्पतालमा प्रारम्भिक उपचारपछि थप उपचारका लागि उनलाई बीएण्डबी अस्पताल, ग्वार्को रिफर गरिएको प्रहरीले जनाएको छ। उनको अवस्था गम्भीर रहेको बताइएको छ।
दुर्घटनामा संलग्न ट्रक चालक मकवानपुर मनहरी–५ निवासी ३८ वर्षीय राम मोक्तानलाई प्रहरीले नियन्त्रणमा लिई घटनाबारे थप अनुसन्धान अघि बढाएको जनाएको छ।
