काठमाडौं। धनुषाकी रुवीकुमारी ठाकुर उपसभामुख पदमा निर्वाचित भएसँगै श्रम संस्कृति पार्टीको प्रभाव राज्यका प्रमुख संवैधानिक निकायसम्म विस्तार भएको छ। पार्टी अध्यक्ष हर्क साम्पाङको परोक्ष उपस्थिति अब संवैधानिक परिषदसम्म पुगेको छ।
प्रतिनिधिसभामा ७ सदस्यसहित राष्ट्रिय राजनीतिमा उदाएको श्रम संस्कृति पार्टीले पहिलोपटक उच्च संवैधानिक संरचनामा प्रभाव जमाएको हो। धरान उपमहानगरपालिकाका पूर्वमेयरसमेत रहेका हर्क साम्पाङ अब प्रत्यक्ष नभए पनि उपसभामुखमार्फत् राज्यको निर्णय प्रक्रियामा पहुँच राख्ने अवस्थामा पुगेका छन्।
संवैधानिक परिषदमा प्रधानमन्त्री अध्यक्ष रहने र सदस्यमा प्रधानन्यायाधीश, प्रतिनिधिसभाका सभामुख, राष्ट्रियसभाका अध्यक्ष, प्रमुख प्रतिपक्ष दलका नेता तथा उपसभामुख रहने व्यवस्था छ। सोही व्यवस्थाअनुसार उपसभामुख ठाकुरको उपस्थितिले श्रम संस्कृति पार्टीलाई परिषदमा प्रवेश गराएको हो।
यस परिषदले विभिन्न संवैधानिक आयोगका पदाधिकारी तथा सर्वोच्च अदालतका न्यायाधीश नियुक्तिसम्मको महत्वपूर्ण अधिकार राख्ने भएकाले यसको पहुँचलाई राजनीतिक रूपमा निकै अर्थपूर्ण मानिन्छ। यस्तो अवस्थामा सानो दल भए पनि श्रम संस्कृति पार्टीको प्रभाव विस्तार हुनु महत्वपूर्ण घटनाका रूपमा हेरिएको छ।
यसपटकको संरचनामा प्रमुख दलहरू मध्ये नेकपा एमालेको प्रत्यक्ष प्रतिनिधित्व नरहेको अवस्थामा श्रम संस्कृति पार्टीको उपस्थितिले शक्ति सन्तुलनमा नयाँ समीकरण देखिएको छ। यो परिणामले हर्क साम्पाङको राजनीतिक हैसियत अझ सुदृढ बनाएको छभने, श्रम संस्कृति पार्टीको संबैधानिक निकायमा पनि बलियाे हैसियत बनेकाे छ।
