खोटाङ । कोशी प्रदेशको खानेपानी, सिँचाइ तथा ऊर्जा मन्त्रालयले खोटाङस्थित खानेपानी तथा सरसफाइ डिभिजन कार्यालयमा भएको पाइप खरिद अनियमितता प्रकरणमा औपचारिक छानबिन सुरू गरेको छ। उक्त प्रकरणको गहिरो अध्ययनका लागि मन्त्रालयले तीन सदस्यीय छानबिन समिति गठन गरेको हो।
चैत १९ गते प्रकाशित समाचारमा महालेखा परीक्षकको २०८१ को प्रतिवेदन उद्धृत गर्दै पाइप खरिदमा गम्भीर अनियमितता भएको खुलासा गरिएको थियो। सो समाचार सार्वजनिक भएपछि मन्त्रालयले चासो देखाउँदै तत्काल छानबिन प्रक्रिया अघि बढाएको हो।
मन्त्रालयका सचिव पुष्कर पोखरेलका अनुसार जनतालाई यथार्थ जानकारी दिनु राज्यको दायित्व भएकाले छानबिन समिति गठन गरिएको हो। मन्त्रालयका शाखा अधिकृत ईश्वर थापाको नेतृत्वमा बनेको उक्त समितिले कामसमेत सुरू गरिसकेको छ।
महालेखाको प्रतिवेदनअनुसार डिभिजन कार्यालयले १८ वटा खानेपानी आयोजनाका लागि ३ करोड ६३ लाख ८८ हजार रुपैयाँ बराबरका ४ लाख २७ हजार १३२ मिटर पाइप खरिद गरेको थियो। तर जिन्सी खातामा सबै पाइप खर्च भएको देखाइए पनि नापी किताबमा भने ३ लाख ८२ हजार ५२७ मिटर मात्र जडान भएको भेटिएको छ।
यसरी खरिद र जडानको विवरण मिलाउँदा ४४ हजार ५४५ मिटर पाइप गायब देखिएको छ, जसलाई प्रतिवेदनले स्पष्ट अनियमितता ठहर गरेको छ। मन्त्रालयले यसअघि स्पष्टीकरण सोध्दा आएको जवाफ चित्तबुझ्दो नभएपछि थप अनुसन्धानका लागि समिति गठन गरिएको जनाएको छ। साथै, प्रदेशको सार्वजनिक लेखा समितिले पनि यस विषयमा स्थलगत अनुगमनलाई तीव्र बनाएको छ।
